VOV4.Bahnar - Kơ yuơ Kơdră chĕp pơgơ̆r Kuô̆k hô̆i Vương Đình Huệ chĕp pơgơ̆r, pơgê năr 10/11, ‘măng apĭnh păng tơl nơ̆r apĭnh mă blŭng hăm rim tơdrong jang pơgang hlôi đei pơgơ̆r. Iung pơma tơ̆ pơgơ̆r blŭng a apĭnh hơlen, Kơdră chĕp pơgơ̆r Kuô̆k hô̆i Vương Đình Huệ pơma hơdăh: tơdrong jang apĭnh ư̆h khan lăp mĭnh tơdrong jang vă dăr lăng, atŏk kơtang hơnăp jang tơblang hơdăh, mă kăl hăm bơngai chĕp kơ̆l hơnĭh bơ̆ jang, mă lei ‘nau oei jing vă tơgŭm ăn tơdrong jang dăr lăng, adoi nhen jang kiơ̆ hơnăp jang pơjing khôi luơ̆t păng Tơchơ̆t rim tơdrong kăl tĕh đak. Apĭnh Kơdră chĕp pơgơ̆r Dơnŏ anĭh tơm vei lăng jang pơgang Nguyễn Thanh Long, lơ kơdră tơlĕch nơ̆r apĭnh găh tơdrong sơđơ̆ng pơtrŭh ăn păng vei lăng kơ jă khăm hơlen Covid-19, pơgang ming hơmet jĭ jăn, tơmam drăm jang pơgang, tơmam sinh hŏk khăm hơlen.  Tơdrong “tơsŭl tơsăl kơ jă khăm hơlen Covid-19” jei pơm ăn pơma dơnŭh kơtang lơ̆m Hop akŏm Kuô̆k hô̆i. Kơdră chĕp pơgơ̆r Dơnŏ anĭh tơm vei lăng jang pơgang Nguyễn Thanh Long akhan: kơ jă tơmam drăm kmăi kmŏk, sinh hŏk mơ̆ng kiơ̆ lơ̆m hơnĭh pơm tơlĕch tơmam drăm ‘nŏh, ‘moi kiơ̆ khei ‘năr răt. Adoi ƀô̆h hơdăh ‘nau hơnăp jang kơ hơnĭh păng pơkăp tơlĕch jang kơtang dăr lăng, lăng hơlen tơdrong kơ jă khăm hơlen lơ̆m khei năr kơnh. Lơ kơdră tang măt athei pơm hơdăh tơdrong dăr lăng hơlen đơ̆ng Dơnŏ anĭh tơm vei lăng jang pơgang pơm ăn đei tơdrong pơm glăi lơ̆m khei năr au ki. Kơdră chĕp pơgơ̆r Kuô̆k hô̆i Vương Đình Huệ athei: sơnăm 2022 akŏm dăr lăng, lăng hơlen kơtang lơ̆m tơdrong chă hơvơn, vei lăng iŏk yua khŭl jang ăn bơ̆ jang tang găn jĭ hơbŭh, tang găn bơ̆ jang ư̆h kơ ‘lơ̆ng, iŏk yua sa hơpăh ăn kơ dĭh.

Tơblơ̆ nơ̆r: Amazưt