VOV4.Bahnar - Hơ nơ̆ng tơ drong jang ‘măng hop akŏm mă 2, pơ gê hei, Kuôk hô̆i pơ drơ̆ng kiơ̆ tơ drong tơ chơ̆t găh jên jang kơ teh đak sơ năm 2022; rim Tơ drong tơ chơ̆t găh trong jang tơ gŭm hơ drô̆ hơ tŏk tơ iung pơ lei tơm Hải Phòng păng dôm dêh char Nghệ An, Thanh Hóa, Thừa Thiên Huế; Tơ drong tơ chơ̆t găh chĕng hơ met iŏk yua teh kơ teh đak khei ‘năr 2021-2030, trĕng lăng truh sơ năm 2050 păng trong vă jang iŏk yua teh 5 sơ năm 2021-2025. Đơ̆ng rŏng ‘noh Kuôk hô̆i hop akŏm pơ tôch ‘măng hop akŏm mă 2, Kuôk hô̆i jăl 15. Lơ̆m kơ sơ̆ brei, hăm lơ bơ ngai tang măt drơ̆ng lăp, Kuôk hô̆i hlôi pơ drơ̆ng kiơ̆ Tơ drong tơ chơ̆t găh Trong vă jang hơ met ming dơ̆ng mŭk drăm jăl jang 2021-2025. Kiơ̆ kơ ‘noh truh sơ năm 2025, hơ drin lơ̆m teh đak đei dang 1,5 triệu anih jang mơ dro sa, lơ̆m noh đei dang 60.000 - 70.000 anih jang mơ dro sa păh lăp păng iĕ; kơ sô̆ vang tơ gop đơ̆ng tơ ring jang mŭk drăm kơ dih lơ̆m GDP dang 55%. Tơ chơ̆t găh Trong vă jang hơ met ming dơ̆ng mŭk drăm jăl jang 2021-2025 tơ lĕch ăn ‘meh vă: hơ met ming dơ̆ng mŭk drăm tơ klep hăm tơ plih ‘nao tơ drong jang tŏk kiơ̆ trong vei sơ đơ̆ng, hơ tŏk ‘lơ̆ng iŏk yua, tơ drong ‘lơ̆ng, đei yua păng kơ sư̆k pơ jei băl, hơ tŏk ‘lơ̆ng tơ drong pơm lăp păng kơ sư̆k tơ jră pŭ đơ̆ng mŭk drăm. Tơ chơ̆t tơ lĕch ăn dôm grŭp tơ drong tơm, hơ găt găh lơ truh sơ năm 2025.

Thuem: Tơ blơ̆