VOV4.Bahnar - Năr ‘nâu, 28/7, Kuô̆k hô̆i pơ gơ̆r jơ hôp mă hơ tuch kơ Hop akŏm mă 1, Kuô̆k hô̆i jăl 15. Adrol kơ pơ tôch hop akŏm, Kuô̆k hô̆i drơ̆ng nơ̆r ăn dôm tơ drong tơ chơ̆t găh tơ drong kĭ pơ kăp pôk hơ tŏk Phó Thủ tướng, Kơ dră tơm, dôm bơ ngai jang lơ̆m Khul kơ dră tĕh đak; Tơ drong tơ chơ̆t kĭ pơ kăp pôk hơ tŏk Phŏ Kơ dră păng dôm bơ ngai jang lơ̆m Anih vei lăng sơ đơ̆ng tĕh đak; drơ̆ng nơ̆r ăn tơ drong Tơ chơ̆t găh pôk hơ tŏk bơ ngai jang pơm Kơ dră pơ gơ̆r sek tơ lang tơ̆ Anih tơm sek tơ lang kon pơ lei.

Kuô̆k hô̆i oei drơ̆ng nơ̆r ăn tơ drong Tơ chơ̆t găh tơ drong thu mong, tơ lĕch jên jang tĕh đak sơ năm 2019. Tơ chơ̆t găh trong jang jên hu 5 sơ năm kơ tĕh đak đơ̆ng 2021-2025. Tơ chơ̆t găh trong tơ mât jên jang ăn Tơ drong jang tơm kơ tĕh đak Tơ jur tơ nuh hin kơ jăp ‘lơ̆ng đơ̆ng 2021-2025. Tơ chơ̆t găh trong tơ mât jên jang ăn Tơ drong jang tơm kơ tĕh đak pơ jing tơ ring tơ rang ‘nao đơ̆ng 2021-2025 păng Tơ chơ̆t găh trong tơ mât jên jang kơ tĕh đak đunh păh lăp đơ̆ng 2021-2025.

Hơ tuch jơ kơ sơ̆ brei, Kuô̆k hô̆i hôp ‘ngoăih jơ jang, hlôi drơ̆ng nơ̆r ăn 3 tơ drong Tơ chơ̆t gĭt kăl ‘nŏh jĭ: Tơ chơ̆t găh trong jang atŏk tơ iung mŭk drăm, tơ pôl 5 sơ năm 2021-2025. Tơ chơ̆t găh Tơ drong chih pơ jing luơ̆t, tơ drong hơ găt sơ năm 2022, hơ met ming tơ drong chih pơ jing luơ̆t, tơ drong hơ găt sơ năm 2021. Tơ chơ̆t găh tơ drong pơ jing Khul dăr lăng kiơ̆ tơ drong jang kơ Kuô̆k hô̆i năm 2022. Kăl hlŏh ‘nŏh, sơ năm 2022, Kuô̆k hô̆i vă set hơ len, tơ gop nơ̆r ăn tơ drong hơ met ming Luơ̆t tĕh.

Dư̆ng: Tơ blơ̆