VOV4.Bahnar - Gơmăng năr 16/7, tơ̆ Hnam Kuô̆k hô̆i, Dơnŏ anĭh bơ̆ jang Kuô̆k hô̆i păng Dơnŏ anĭh Trung ương Mặt trận Tổ quốc Việt Nam jang hơdoi pơgơ̆r Hop akŏm găh bơ̆ jang kơ Dơnŏ anĭh bơ̆ jang Kuô̆k hô̆i păng Khŭl kơdră chĕp pơgơ̆r Dơnŏ anĭh Trung ương Mặt trận Tổ quốc Việt Nam. Kơdră chĕp pơgơ̆r Kuô̆k hô̆i Vương Đình Huệ hăm Kơdră chĕp pơgơ̆r Dơnŏ anĭh Trung ương Mặt trận Tổ quốc Việt Nam Đỗ Văn Chiến vang pơm tơm hop akŏm. Tơ̆ hop akŏm, rim kơdră tang măt hlôi mơ̆ng tơroi tơbăt hla bơar chĭh tơbăt tơdrong jang păng pơma dơnŭh găh bơ̆ jang hơdoi ƀar păh hơnĭh jang lơ̆m khei năr au ki adoi nhen tơlĕch tơdrong jang trŭh au kơnh. Iung pơma pơtôch hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, vă hơnơ̆ng atŏk kơtang đei jơnei bơ̆ jang hơdoi ƀar păh Dơnŏ anĭh bơ̆ jang Kuô̆k hô̆i păng Khŭl kơdră chĕp pơgơ̆r Dơnŏ anĭh Trung ương Mặt trận Tổ quốc Việt Nam, hop akŏm drơ̆ng mĭnh nơ̆r kăl hrôih chă tơchĕng hơnơ̆ng pơm pơkeh khôi luơ̆t găh pôk rơ̆ih, sơđơ̆ng ƀlep hăm tơdrong yan au.

Tơblơ̆ nơ̆r: Amazưt