VOV4.Bahnar - Hơ nơ̆ng tơ drong jang ‘măng hop akŏm mă mônh, Kuôk hô̆i jăl 15, pơ gê hei (13/7), Anih chĕp kơ̆l pơ gơ̆r Kuôk hô̆i tơ roi tơ băt pơ tôch pơ ma dơ nuh tơ̆ Khŭl găh proh hơ met bơ ngai jang kơ Khŭl kơ dră teh đak. Tơ drong tơm lơ̆m hla ar tơ roi đơ̆ng khŭl kơ dră teh đak ‘noh jĭ vei đêl 18 anih tơm păng 4 anih jang hơ tŏ hăm anih tơm nhen jăl jang hơ drol. Đơ̆ng rŏng mơ̆ng khŭl kơ dră teh đak tơ roi tơ băt Kuôk hô̆i găh tơ drong tơ roi tơ blang, chih iŏk nơ̆r tơ gop đơ̆ng bơ ngai tang măt Kuôk hô̆i găh  proh hơ met bơ ngai jang kơ khŭl kơ dră teh đak, tơ chĕng hơ drol rim bơ ngai tang măt gô pơ ma dơ nuh, pơ drơ̆ng kiơ̆ tơ drong tơ chơ̆t găh proh hơ met bơ ngai jang kơ Khŭl kơ dră teh đak jăl jang 2021-2026 hăm kơ măy pơ drơ̆ng kiơ̆ điên tư. Đang kơ ‘noh, Kuôk hô̆i mơ̆ng tơ roi tơ băt găh trong tơ lĕch jang jên hu teh đak, trong tơ lĕch jang tŏk iŏk, kla hre teh đak 5 sơ năm jăl jang 2021-2025 păng tơ roi tơ băt dăr hơ len găh tơ drong ‘nâu. Tơ̆ kơ sơ̆, Kuôk hô̆i mơ̆ng hla ar tơ roi găh trong jang tơ mơ̆t jên jang Tơ drong jang tơm teh đak Tơ jur dơ nuh hin kơ jăp jăl jang 2021-2025, tơ roi tơ băt dăr hơ len lăng găh tơ drong ‘nâu.

Thuem: Tơ blơ̆