VOV4.Bahnar - Pơ gê ‘năr 21/10, rim bơ ngai tang măt Kuôk hô̆i hlôi pơ ma dơ nuh tơ̆ grŭp găh trong tơ lĕch jang hơ tŏk tơ iung mŭk drăm - tơ pôl 2022 păng tơ drong jang tang găn jĭ Covid-19. Rim bơ ngai tang măt lăng ‘lơ̆ng trong jang trŏ ƀlep păng dôm trong jang tôm tơ drong păng tơ tom hlôi đei tơ lĕch jang lơ̆m khei ‘năr âu ki, tơ gŭm đei dôm jơ nei gĭt kăl, nhen: Truh dang ei, jĭ hơ buh đei vei lăng lơ̆m teh đak; trong jang tơ jră hăm rim tơ drong đei tơ plih đơ̆ng jĭ hơ buh đei tơ lĕch ăn păng pơ tơm tơ plih jing pơm lăp sơ đơ̆ng, tơ tĕnh, vei lăng đei yua jĭ hơ buh hăm tơ drong tơm vei lăng tôch ai jơ hngơ̆m pran, hơ kâu jăn kơ kon pơ lei; lơ tơ drong đei ƀôh ‘lơ̆ng lơ̆m tơ iung ming păng hơ tŏk tơ iung mŭk drăm - tơ pôl; hơ nhăk teh đak tơ plih jing hmă ‘nao hrôih hloh. Kiơ̆ kơ rim bơ ngai tang măt, đei 3 tơ drong tơm ‘noh gô jing tơ drong ‘lơ̆ng hơ tŏk tơ iung mŭk drăm tơ pôl sơ năm 2022, ‘noh jĭ tơ iung ming - pơ trŭt pơm tơ lĕch tĕch mơ dro, tŭn pran tĕch tơ lĕch tơ̆ teh đak đe păng tŭn hrĕnh tơ drong tơ lĕch jên asong jang kơ teh đak vă hơ vơn jên jang đơ̆ng tơ pôl hơ tŏk tơ iung anih jang kăl.

Thuem: Tơ blơ̆