VOV4.Bahnar - Kơ sơ̆ ‘năr 4/1, pơ ma dơ nuh tơ̆ grŭp găh tơ drong tơ chơ̆t trong jang tơ gŭm jên hu vă tơ gŭm Tơ drong jang tơ iung ming dơ̆ng păng hơ tŏk tơ iung mŭk drăm - tơ pôl, rim bơ ngai tang măt drơ̆ng nơ̆r kăl kơ tơ lĕch trong jang tơ gŭm jên hu, vă tơ iung ming, hơ tŏk tơ iung hrĕnh pơm tơ lĕch tĕch mơ dro; vei sơ đơ̆ng tơ drong arih sa tơ pôl. Mă lei, 1,2 ‘nu bơ ngai tang măt kŭm tơ ƀôh đon tơ tăm găh rim trong jang tơ gŭm jên hu đei jang kiơ̆ gô hơ nhăk ưh kơ ‘lơ̆ng găh jên hu, ưh kơ ‘lơ̆ng găh teh, hnam.

Hơ dai hăm ‘noh, athei trong jang tơ gŭm jên hu akŏm lơ̆m rim tơ drong jang kăl kơ đei pơ trŭt, đei yua ‘lơ̆ng. Rim bơ ngai tang măt kŭm akhan tam mă đei tơ drong pơm dang ăi đơ̆ng trong jang tơ gŭm jên hu lơ̆m tơ drong tơ chơ̆t vă tơ gŭm tơ iung ming dơ̆ng păng hơ tŏk tơ iung mŭk drăm - tơ pôl. Pơ ma dơ nuh tơ̆ grŭp, Kơ dră teh đak Nguyễn Xuân Phúc athei tơ mơ̆t thim grŭp trong jang pơm hơ tŏk iŏk yua jên jang teh đak, vei sơ đơ̆ng thu mong jên jang teh đak kơ jăp, hơ tŏk tơ drong rơ đăh đơ̆ng jên jang păng hơ tŏk hơ năp jang vei lăng đơ̆ng tơ drong jang thuê̆.

Bơ ngai tang măt Nguyễn Trường Giang, khŭl tang măt Kuôk hô̆i dêh char Dak Nông drơ̆ng lăp hăm trong jang ưh kơ iŏk thuê̆, tơ jur 1,2 kơ loăi thuê̆, lơ̆m noh đei tơ jur thuê̆ kơ jă tŏk 2% tơ mơ̆t yua ăn rim tơ mam pŭ thuê̆ tơ lĕch 10%. Mă lei, bơ ngai tang măt athei kăl kơ hơ len lăng tơ drong jang tơ mơ̆t yua, akŏm lơ̆m rim tơ drong jang kăl đei pơ trŭt, đei iŏk yua ‘lơ̆ng.

Rim bơ ngai tang măt kŭm athei mưh tơ drong tơ chơ̆t đei pơ drơ̆ng kiơ̆, Khŭl kơ dră teh đak păng rim anih tơm, anih jang pơ kăp, pơm hơ dăh hơ năp jang chĭnh trĭ, hơ năp jang tơ blang rơ đăh, mă loi ‘noh jĭ hơ năp jang bơ ngai chĕp kơ̆l lơ̆m chĕp kơ̆l pơ gơ̆r păng dăr hơ len tơ drong tơ lĕch jang kiơ̆ trong jang tơ gŭm, vei sơ đơ̆ng ƀlep tơ drong hơ găt, veh ver iŏk yua lơ trong jang tơ gŭm, vei sơ đơ̆ng tơ drong đei iŏk yua păng ‘lơ̆ng.

Bơ ngai tang măt Kuô̆k hô̆i tơ gop nơ̆r tơ̆ anih pơih pơ dăh Dak Lak

Đơ̆ng rŏng mơ̆ng Khul kơ dră tĕh đak pơ re hla ar tơ roi găh 3 tơ drong tơ chơ̆t păng 1 kơ luơ̆t oei chih pơ jing tơ̆ hop akŏm ưh ê kơ Kuô̆k hô̆i jăl XV, Khul tang măt Kuô̆k hô̆i dêh char Dak Lak drơ̆ng nơ̆r păng tơ chĕng ‘lơ̆ng dôm hla ar chih, tơ tom tơ lĕch lơ tơ drong kăl, vă pơ yoa ăn tơ drong jang tơ iung ming păng jang tŏk mŭk drăm tơ pôl. Dôm bơ ngai tang măt oei tơ gop nơ̆r ăn tơ drong tơ chơ̆t găh trong jang jên hu vă tơ gŭm ăn tơ drong jang tơ iung ming păng jang tŏk mŭk drăm tơ pôl. Mă lei bơ ngai tang măt Lê Thị Thanh Xuân tơ ƀôh đon tơ tăm găh dôm kơ sô̆ chih jô̆ đei tơ lĕch.

Găh khei ‘năr bơ̆ jang dôm tơ drong tơ gŭm, bơ ngai tang măt Nguyễn Thị Thu Nguyệt, ăn tơ băt, mưh tơ lĕch lơ tơ drong tơ gŭm thoi âu mă lei khei ‘năr bơ̆ jang kiơ̆ lăp 2 sơ năm đĕch ‘nŏh kơ đĕh dêh, kơ na trong jang athei chih mă hơ dăh: “Bơ̆ jang thoi yơ vă gơ̆h đei yoa lăp hăm tơ drong đei tơ lĕch ‘nŏh Khul kơ dră tĕh đak athei tơ chĕng hơ len mă rơ đăh, tơ lĕch trong hrơ̆ch ‘lơ̆ng păng athei đei trong jang thoi yơ? Mă 2, athei chă rơih yă kiơ vă pơ ‘nhŏ bơ̆ jang hơ drol mưh tơ lĕch jang dôm tơ drong tơ gŭm âu, thoi nŏh vă gơ̆h đei yoa ‘lơ̆ng. Kiơ̆ đơ̆ng nŏh apinh rơih tơ drong mă blŭng păng tơ drong atŭm hlŏh mă Khul kơ dră tĕh đak athei tơ rĕk păng tơ lĕch hloi dôm trong jang, tơ chĕng hiă tơ drong mơ mat tat, tơ hlăk tăk păng athei pơm thoi yơ vă gơ̆h tơ lĕch jang kiơ̆ lơ̆m 2 sơ năm”.

Thuem hăm Dơ̆ng: Tơ blơ̆