VOV4.Bahnar - Hơ nơ̆ng bơ̆ jang lơ̆m hop akŏm mă 11, năr ‘nâu (5/4) Kuô̆k hô̆i pơ gơ̆r pôk rơih Kơ dră tĕh đak, Thủ tướng tĕh đak kiơ̆ trong tăh kơ phĭu srĕp. Đơ̆ng rŏng đei pôk, Kơ dră tĕh đak ‘nao, Thủ tướng ‘nao vă pơ ma nơ̆r iŏk kơ chư̆k.

Kơ dră Kuô̆k hô̆i Vương Đình Huệ hlôi tơ roi ăn Kuô̆k hô̆i hơ năn ƀok Nguyễn Xuân Phúc vă Kuô̆k hô̆i pôk pơm Kơ dră tĕh đak. Lơ̆m năr ‘nâu, Kơ dră tĕh đak vă roi tơ băt hơ năn ăn Kuô̆k hô̆i pôk rơih bơ ngai pơm Thủ tướng tĕh đak, pơ ma nuh lơ̆m grŭp găh bơ ngai vă pôk pơm Thủ tướng tĕh đak.

Tơ̆ kơ sơ̆, Kuô̆k hô̆i pôk rơih Thủ tướng tĕh đak kiơ̆ trong tăh kơ phĭu srĕp; pơ drơ̆ng nơ̆r ăn tơ drong Tơ chơ̆t pôk rơih Thủ tướng tĕh đak. Đơ̆ng rŏng kơ ‘nŏh Thủ tướng tĕh đak pơ ma nơ̆r iŏk kơ chư̆k tơ̆ hơ năp Kuô̆k hô̆i.

Lơ̆m giĕng âu mơ̆n, giĕng bơ̆ jang mă hơ tuch kơ hop akŏm mă 11, Kuô̆k hô̆i vă asong pơ dơ̆h jang păng pơ gơ̆r pôk rơih Phŏ Kơ dră tĕh đak, 1 kơ sô̆ bơ ngai jang lơ̆m Anĭh chĕp kơ̆l pơ gơ̆r Kuô̆k hô̆i; Kơ dră 1,2 anih jang kơ Kuô̆k hô̆i, tổng Thư ký Kuô̆k hô̆i, Kơ dră jô̆ hơ len jên hu tĕh đak kiơ̆ trong tăh kơ phĭu srĕp.

Dơ̆ng: Tơ blơ̆