VOV4.Bahnar - Kơsơ̆ brei, năr 22/10, Kuô̆k hô̆i mơ̆ng tơroi tơbăt păng pơma dơnŭh tơ̆ Khŭl găh tơdrong jang kiơ̆ trong bơ̆ jang tơgŭm djru, trong jang ƀao hiêm tơpôl, vei lăng păng iŏk yua Anĭh mong jên Ƀao hiêm tơpôl sơnăm 2020; tơdrong vei lăng păng iŏk yua Hơnĭh mong jên ƀao hiêm jang pơgang sơnăm 2020 păng jang kiơ̆ Tơdrong tơchơ̆t kơsô̆ 68 Kuô̆k hô̆i jăl 13 găh atŏk kơtang trong bơ̆ jang tơgŭm, khôi luơ̆t găh ƀao jiêm jang pơgang, yak trŭh ƀao hiêm đĭ đăng kon pơlei lơ̆m 2 sơnăm 2019-2020. Jô̆ trŭh đĭ sơnăm 2020, măt bơngai răt yua ƀao hiêm tơpôl ‘nŏh hlŏh 16 trĭu ‘nu bơngai, hơtŏ vă jê̆ 34% măt bơngai jang. Akŏp đe răt iŏk ƀao hiêm ăn Hơnĭh mong jên ƀao hiêm jang pơgang ‘nŏh hlŏh 110.000 ti hlak jên; ƀao hiêm jang pơgang kla ăn sơnăm 2020 ‘nŏh hlŏh 104.000 ti hlak jên; akŏp kon jên tơmơ̆t lơ̆m Hơnĭh mong jên ƀao hiêm jang pơgang lơ hlŏh akŏp kon jên Hơnĭh mong jên ƀao hiêm jang pơgang kla ăn ‘nŏh 5.000 ti hlak jên. Tơbăt tơdrong bơ̆ jang hơlen lăng đơ̆ng Dơnŏ anĭh bơ̆ jang vei lăng Tơpôl athei Khŭl kơdră tĕh đak hop akŏm pơtôch jang kiơ̆ Tơdrong tơchơt 68 vă tơlĕch ăn nơ̆r athei, nơ̆r apĭnh Kuô̆k hô̆i pơjing Tơdrong tơchơ̆t ƀlep hăm chăl hle; chă tơchĕng trong jang atŏk kon jên răt yua ƀao hiêm mă ƀlep; adoi pơrô̆ athei rim hơnĭh tơm, hơnĭh jang pơgang ƀơm trŭh păng tơring atŏk kơtang bơ̆ jang dăr lăng, lăng hơlen tơdrong jang kiơ̆ trong bơ̆ jang tơgŭm ăn, khôi luơ̆t găh ƀao hiêm jang pơgang; xek tơlang kơ hret dôm bơngai pơm glăi.

Tơblơ̆ nơ̆r: Amazưt