VOV4.Bahnar - Hơnơ̆ng bơ̆ jang, năr au, năr 30/3, Dơnŏ anĭh bơ̆ jang Kuô̆k hô̆i pơtrŭh hla bơar tơlĕch jang Kơdră chĕp pơgơ̆r Kuô̆k hô̆i, Kơdră chĕp pơgơ̆r Jơnŭm pôk rơ̆ih Tĕh đak. Kiơ̆ tơdrong bơ̆ jang pơgê năr 30/3, ‘măng hop akŏm mă 11 Kuô̆k hô̆i jăl XIV pơma dơnŭh tơ̆ Hnam hop akŏm găh rim Hla bơar chĭh tơbăt bơ̆ jang jăl jang 2016-2021 kơ Dơnŏ anĭh tơm Xek tơlang, Viện kiểm sát nhân dân tối cao. Kơsơ̆ năr 30/3, rim kơdră tang măt Kuô̆k hô̆i chă pơma dơnŭh tơ̆ Khŭl găh tơdrong tăh hla tơlĕch jang Kơdră chĕp pơgơ̆r Kuô̆k hô̆i, Kơdră chĕp pơgơ̆r Jơnŭm pôk rơ̆ih Tĕh đak; pơdrơ̆ng nơ̆r drơ̆ng kiơ̆ Khôi luơ̆t Tang găn ma tuý (hơmet ming). Dơnŏ anĭh bơ̆ jang Kuô̆k hô̆i tơroi tơbăt ăn Kuô̆k hô̆i găh pơtôch pơma dơnŭh tơ̆ Khul păng tơblang hơdăh, tơgoăt iŏk nơ̆r tơgop đơ̆ng Kuô̆k hô̆i găh tơdrong tơlĕch jang Kơdră chĕp pơgơ̆r Kuô̆k hô̆i, Kơdră chĕp pơgơ̆r Jơnŭm pôk rơ̆ih Tĕh đak. Kuô̆k hô̆i tơlĕch jang Kơdră chĕp pơgơ̆r Kuô̆k hô̆i, Kơdră chĕp pơgơ̆r Jơnŭm pôk rơ̆ih tĕh đak hăm trong tăh hla hrĕp. Jei lơ̆m kơ sơ̆ năr 30/3, Kuô̆k hô̆i gô pơma dơnŭh tơ̆ Khŭl găh tơdrong măt bơngai kơdră kơpal vă pôk tơmơ̆t jang Kơdră chĕp pơgơ̆r Kuô̆k hô̆i, Kơdră chĕp pơgơ̆r Jơnŭm Pôk rơ̆ih tĕh đak.

Tơblơ̆ nơ̆r: Amazưt