VOV4.Bahnar - Kơ sơ̆ (16/8), tơ̆ Hnam Kuô̆k hô̆i, Kơ dră Kuô̆k hô̆i Vương Đình Huệ pơ gơ̆r hop akŏm găh tơ drong hơ met đơ̆ng Khul tang măt Kuô̆k hô̆i Việt Nam vang năm hop akŏm AIPA-42 vă pơ gơ̆r trư̆k tuyê̆n đơ̆ng ‘năr 23 - 25/8 yoa tĕh đak Brunei, Kơ dră AIPA - 42 pơ gơ̆r.

Tơ̆ hop akŏm, Kơ dră Kuô̆k hô̆i Vương Đình Huệ pơ ma hơ dăh, athei hơ nơ̆ng hơ met pơ ‘lơ̆ng, hơ tŏk tơ drong đei yoa lơ̆m tơ drong jang tơ bôl kơ Kuô̆k hô̆i ‘nŏh jĭ 1 lơ̆m dôm tơ drong tơm vă tơ plih ‘nao lơ̆m tơ drong jang đơ̆ng Kuô̆k hô̆i. Jang tơ bôl nghị viện athei vang pơm hơ tŏk anih dơ̆ng, um rup păng bưng ai kơ tĕh đak bơ̆n lơ̆m tơ ring păng lơ̆m apŭng plenh tĕh.

Kiơ̆ đơ̆ng ‘nŏh, Kơ dră Kuô̆k hô̆i athei, dôm anih jang kơ pal, mă loi ‘nŏh Anih jang tơ bôl păng Anih jang kơ Kuô̆k hô̆i, athei hơ tŏk hrĕnh tơ drong hơ met păng pơm ‘lơ̆ng ăn rim tơ drong vang bơ̆ jang đơ̆ng Khul tang măt kơ Kuô̆k hô̆i Việt Nam tơ̆ Hop akŏm AIPA-42.

Kăl loi, ƀât mă tơ drong jĭ Covid-19 oei tơ pŏh tôch hơ mơt hrei ‘nâu, Kơ dră Kuô̆k hô̆i pơ ma hơ dăh, Kuô̆k hô̆i Việt Nam athei tơ ƀôh hơ dăh đon tơ chĕng găh jang hơ doi đơ̆ng nghị viện dôm tĕh đak AIPA păng dôm tĕh đak ASEAN lơ̆m tơ drong tang găn jĭ Covid-19.

Dơ̆ng: Tơ blơ̆