VOV4.Bahnar -  Kơsơ̆ năr 29/10, tơ̆ Hơnĭh bơ̆ jang Kơdră chĕp pơgơ̆r Tĕh đak, Bí thư Trung ương Đảng, Kơ iĕng Thủ tướng Lê Minh Khái hlôi sơng pơma dơnŭh hăm Kơdră chĕp pơgơ̆r Dơnŏ anĭh tơm jang Đak dau Kuwait tŏk bŏk năm tơmang păng bơ̆ jang tơ̆ tĕh đak bơn. Kơ iĕng Thủ tướng Lê Minh Khái tơbăt, hrei au tơdrong jĭ hơbŭh Covid-19 tơ̆ Việt Nam hlôi đei tang găn hơ iă. Việt Nam hlôi đei pơ̆ih ‘măng dơ̆ng, jang kiơ̆ trong jang “oei sa lăp hăm sơđơ̆ng ‘lơ̆ng hơ iă, tang găn kĕ jĭ Covid-19”. Kơ iĕng Thủ tướng hôn bơnê tơdrong tơgŭm djru vaccine tang găn Covid-19 đơ̆ng Thủ tướng Tĕh đak Kuwait ăn kơ Việt Nam păng akhan, tơdrong mă au gô tơgop lơ̆m tơgŭm Việt Nam hrôih vĭh hơlơ̆k tơdrong erĭh sa hiôk hian ‘nao. Vang tơgŭm djru Việt Nam găh dôm tơdrong tơnap tap kơ yuơ jĭ hơbuh Covid-19 pơm ăn, Kơdră chĕp pơgơ̆r Dơnŏ anĭh tơm jang Đak dau Kuwait tơbăt, ƀlep lơ̆m jơ ‘năr mă au, Thủ tướng Kuwait hlôi tơchơ̆t tơgŭm Việt Nam 500.000 kơliêu vaccine tang găn Covid-19, Khŭl kơdră tĕh đak Kuwait jei lăng hơlen dơ̆ng vă hơnơ̆ng tơgŭm Việt Nam lơ̆m tang găn jĭ hơbŭh.

Tơblơ̆ nơ̆r: Amazưt