VOV4.Bahnar - ‘Năr 26/7, Lâm Đồng hơ nơ̆ng đei dơ̆ng 5 ‘nu jĭ Covid-19, hơ tŏk kơ sô̆ bơ ngai jĭ lơ̆m dêh char tŏk 40 ‘nu. Lơ̆m kơ sô̆ âu, đei 6 ‘nu hlôi đei hơ met klăih jĭ. Lơ̆m kơ sô̆ 5 ‘nu jĭ Covid-19 ‘nao, đei 2 ‘nu ‘noh bơ ngai huơ̆r gre chơ tơ mam brŏk đơ̆ng pơ lei tơm Hồ Chí Minh, 2 ‘nu ‘noh F1 - hơ kăn păng kon kơ 1 lơ̆m 2 ‘nu bơ ngai huơ̆r gre âu păng 1 ‘nu chă ƀôh kiơ̆ đơ̆ng khăm hơ len tơ̆ tơ pôl. Ƀơm truh dôm bơ ngai jĭ ‘nao, khŭl linh kơ pal dêh char Lâm Đồng hlôi pơm kiơ̆ tơ chă đei 66 ‘nu F1, 189 ‘nu F2, hơ dai hăm ‘noh hơ nơ̆ng tơ lĕch jang tơ drong jang chĕng gơ var tơ ring, dăr hơ len pơ rang jĭ păng tơ chă bơ ngai ƀơm truh tơ̆ 15 hơ nih đei hơ mơt tơ̆ 2 apŭng Đức Trọng păng Đơn Dương.

Thôn Fi Nôm, xăh Hiệp Thạnh, apŭng Đức Trọng (Lâm Đồng) tŏk bŏk pơm kiơ̆ tơ păt ư̆h kơ ăn yak vih vơ̆t lơ̆m tơ pôl kiơ̆ tơ drong tơ chơ̆t 16 đơ̆ng Thủ tướng teh đak

‘Ngoăih kơ tơ chă bơ ngai ƀơm truh 5 ‘nu jĭ ‘nao lơ̆m dêh char, Lâm Đồng kŭm tŏk bŏk hăt hot tơ chă dôm bơ ngai ngôi tơ jê̆ hăm bơ ngai jĭ  95575 tơ̆ Ninh Thuận. Hơ drol ‘noh, bơ ngai jĭ âu oei păng bơ̆ jang tơ̆ Đà Lạt, đei ngôi tơ jê̆ hăm lơ bơ ngai. Jô̆ truh 12 jơ ‘năr dơ̆ng ‘năr 26/7, Lâm Đồng đei đĭ đăng 40 ‘nu jĭ Covid-19. Lơ̆m dêh char tŏk bŏk pơm kiơ̆ ăn oei hơ drô̆ 5.643 ‘nu. Tơ drong jang tang găn jĭ Covid-19 tŏk bŏk đei rim anih jang kơ pal lơ̆m dêh char hơ drin tơ lĕch jang.

Thuem: Tơ blơ̆