VOV4.Bahnar - Mă đơ̆ng tơ drong tơ dra, tang găn, tơ jră hăm ‘mi kial hơ nơ̆ng đei Lâm Đồng jang pran ‘lơ̆ng, mă lei hiong răm đơ̆ng tơ drong sar bar, tŏ ‘mi kial kơ nê̆ pơm tơ lĕch tơ̆ dêh char ‘nâu oei tôch lơ. Đơ̆ng blŭng sơ năm truh dang ei, dêh char Lâm Đồng đei 20 ‘măng ‘mi tih, ‘mi prĕl, 12 ‘măng phŭt huơ̆r, 2 ‘măng tĕh hơ lih păng 5 ‘măng glăih tăih pơm ăn 2 ‘nu bơ ngai lôch păng 2 ‘nu bơ ngai rơ ka. Tơ drong sar bar oei pơm ăn hlŏh 1.300 ha ‘long pơ tăm hư răm păng hiong pơ gŏh, 1,2 ha dơ nâu đak rong ka hơ dang răm kơ đak tơ jroh, 379 tŏ hnam kŭm hăm 20 ha hnam kơ mil, hnam kơ lư̆i păng 3 anih jang hư... akŏm đĭ đăng hiong răm dang 53 ti hlak jên.

Kiơ̆ ƀok Nguyễn Hà Lộc, Kơ dră Anih vei lăng dơ nâu đak, bơ ngai jang lơ̆m Anih pơ gơ̆r tang găn sar bar păng chă dŏng bơ ngai răm kơ dêh char Lâm Đồng, mă đơ̆ng 68 anih pơ tŏ ‘mi jur hăm kơ măy kơ dâu kơ dih kơ dêh char hlôi bơ̆ jang tôch đei yoa, kŭm hăm đon hlôh vao păng băt trong tang găn sar bar đơ̆ng kăn ƀô̆ păng kon pơ lei roi tŏk, mă lei tŏ ‘mi kial đa đei ưh ê kơ na pơm tơ lĕch hiong răm tơ̆ dêh char oei lơ đĕch. Vă găn tôch ai tơ drong hiong răm, ‘ngoăih kơ răt hơ met kơ măy kơ mŏk ‘nao, roi tơ băt hơ drol tơ drong sar bar, dêh char oei akŏm jơ hngâm bơ̆ jang lơ trong vei sơ đơ̆ng dơ nâu đak hai.

Dơ̆ng: Tơ blơ̆