VOV4.Bahnar - Đơ̆ng rŏng khei ‘năr pơ dơ̆h lê̆ ‘mơ̆i lơ tơ drong jang vă tang găn Covid-19, Anih vei lăng kon pơ lei dêh char Lâm Đồng tơ lĕch hla ar asong ăn 1,2 tơ drong mơ dro sa bơ̆ jang hơ lơ̆k dơ̆ng jô̆ đơ̆ng 2 jơ kơ sơ̆ ‘năr 27/5. Kiơ̆ kơ ‘noh, 1,2 tơ drong mơ dro sa nhen yuă sŏk, pơm ngă, hơ nih mơ dro sŏng sa tơ̆ jih trong păng dôm tơ drong tơ plŏng kơ dâu, kâu lak ƀô̆ tơ plŏng kơ dâu bơ̆ jang hơ lơ̆k dơ̆ng đơ̆ng 2 jơ kơ sơ̆ ‘năr 27/5. Lơ̆m kơ plăh ‘noh, rim tơ drong mơ dro sa hơ nih et sa, karaoke, hơ ri hơ soang, pơ ngôi điện tử, kơ chơ tĕch tơ̆ gơ măng, massage, hơ nih pơ dăh phim, rim tơ drong pơ gơ̆r joh hơ ri păng rim tơ drong ngôi pơ chơt akŏm tơ̆ rim cham să , jih dơ nâu đak, cham ngôi pơ hiơ̆, rim tơ drong pơ gơ̆r pơ long đă ƀŏng lŏng tơ plŏng kơ dâu oei athei pơ dơ̆h ‘mơ̆i ding truh đei tơ roi tơ băt plơ̆ng. Dang ei Lâm Đồng tŏk bŏk pơm kiơ̆ ăn oei hơ drô̆ 209 ‘nu bơ ngai năm đơ̆ng tơ ring jĭ, lơ̆m noh đei 10 ‘nu ăn oei hơ drô̆ tơ̆ hơ nih jang pơ gang, 127 ‘nu bơ ngai ăn oei hơ drô̆ akŏm păng 72 ‘nu bơ ngai ăn oei hơ drô̆ tơ̆ hnam. Pơ gê ‘năr 27/5, đei dơ̆ng 52 ‘nu hơ len lăng ăn ƀôh ư̆h kơ đei yŏng jĭ Covid-19.

Thuem: Tơ blơ̆