VOV4.Bahnar - Jang kiơ̆ “Oei sa joăt sơđơ̆ng ‘lơ̆ng hơ iă, tang găn jơnei jĭ hơbuh Covd-19” kiơ̆ Tơdrong tơchơ̆t 128 đơ̆ng Khŭl kơdră Tĕh đak, dêh char Lâm Đồng tŏk bŏk atŏk kơtang bơ̆ jang ƀet bơ̆ng vaccine ăn kon pơlei. Trŭh dang ei, dêh char Lâm Đồng hlôi ƀơk ăn hlŏh 1 trĭu 500.000 kơliêu vaccine tang găn jĭ Covid-19. Dêh char hlôi jang keh đang 20 ‘măng ƀet păng tŏk bŏk iung jang ƀet bơ̆ng ‘măng mă 21. Hăm dôm pơgang vaccine au, Lâm Đồng ƀet vaccine jrŭm mă 1 jơnei 96,2% păng jrŭm mă 2 ‘nŏh 44% ăn dôm bơngai đơ̆ng 18 sơnăm năm tơ̆ ‘lŏ kră.

Kiơ̆ đơ̆ng Dơnŏ anĭh vei lăng jang pơgang dêh char Lâm Đồng, ‘ngoăih kon pơlei hlŏh 18 sơnăm, dêh char jei tŏk bŏk pơjing trong vă jang ƀet bơ̆ng vaccine ăn hơ iŏh đơ̆ng 12 sơnăm trŭh 17 sơnăm. Atŭm hăm atŏk kơtang ƀet vaccine, rim trong jang anai lơ̆m jang kiơ̆ “oei sa joăt sơđơ̆ng ‘lơ̆ng hơ iă, tang găn jơnei jĭ hơbŭh Covid-19” jei đei dêh char lăng kơ jăp păng atŏk kơtang jang kiơ̆.

Tơblơ̆ nơ̆r: Amazưt