VOV4.Bahnar - ‘Năr dơ̆ng năr 19/11, khŭl bơ̆ jang apŭng Lâm Hà, dêh char Lâm Đồng hlôi pơma dơnŭh păng chơ mĭnh ‘nu bơngai jĭ Covid-19 vĭh hơlơ̆k dơ̆ng tơ̆ hơnih ăn oei hơdrô̆ ming hơmet jĭ lăp đơ̆ng rŏng mĭnh năr bơngai au kơdau klĕnh. Bơngai drŏ nglo kơdau klĕnh đơ̆ng hơnĭh ăn oei hơdrô̆ ming hơmet jĭ jăn ‘nŏh ƀok C.P (tơring Phước Chính, apŭng Bác Ái, dêh char Ninh Thuận).

Hơdrol kơ ‘nŏh, năr 16/11, ƀok C.P hao gre bơbĭt năm tơ̆ apŭng Lâm Hà (Lâm Đồng) vă jang phĕ chehphe đe. Ƀok C.P đei hơnĭh jang pơgang khăm Test rĕnh păng khăm PCR jei đei ƀô̆h tơpŏh sơmach jĭ Covid-19 păng chơ ba năm oei hơdrô̆ akŏm tơ̆ hơnĭh ming hơmet jĭ Covid-19 tơ̆ tơring Tân Văn, apŭng Lâm Hà. Trŭh kơsơ̆ năr 18/11, ƀok C.P klĕnh lĕch đơ̆ng hơnĭh ming hơmet jĭ. Lăp đơ̆ng rŏng băt tơdrong au, apŭng Lâm Hà hlôi hơvơn khŭl jang năm tơchă. Đơ̆ng rŏng hơdrin tơchă lơ̆m 1 năr, ‘năr dơ̆ng năr 19/11, khŭl bơ̆ jang ƀô̆h ƀok C.P tŏk bŏk klĕnh tŏk hao ‘long kơ jung lơ̆m hơnĭh au. Lăp đơ̆ng rŏng ‘nŏh bơngai tang măt ăn kơdră tơring, khŭl bơ̆ jang chă pơma pơlung păng ba ƀok C.P vĭh hơlơ̆k tơ̆ hơnĭh ăn oei hơdrô̆ ming hơmet jĭ Covid-19.

Tơblơ̆ nơ̆r: Amazưt