VOV4.Bahnar - Pơ gê 15/6, Anih vei lăng tơ drong jĭ jăn Lâm Đồng ăn tơ băt: Hrei ‘nâu, dêh char Lâm Đồng oei bơ̆ jang ‘lơ̆ng kiơ̆ tơ drong hơ găt ăn oei hơ drô̆ păng set hơ len pơ rang jĭ SARS-CoV-2. Hăm tơ drong oei hơ drô̆ tơ̆ aniuh oei atŭm, jơ năr oei hơ drô̆ truh 21 năr jô̆ đơ̆ng năr mât oei blŭng a păng set hơ len jĭ SARS-CoV-2 mă ưh đei pơ rang jĭ tŏ sĕt hlŏh ‘nŏh 3 ‘măng.

Hăm bơ ngai oei hơ drô̆ tơ̆ hnam, jơ năr oei hơ drô̆ 14 năr, tơ drong set hơ len jĭ mă hơ tuch ưh đei pơ rang jĭ SARS-CoV-2 gô đei nơ̆r pơ tho athei hơ len năng jơ hngâm pran tơ̆ hnam 7 năr dơ̆ng. Dôm bơ ngai oei hơ drô̆ tơ̆ hnam pơm kiơ̆ tơ drong tơ chơ̆t đơ̆ng Dơ nŏ anih vei lăng kon pơ lei xăh, phường, thĭ trơ̆n tơ̆ tơ ring sư oei xa; atŭm hăm ‘nŏh đei tơ drong vei lăng đơ̆ng dôm Khul tang găn jĭ Covid-19 lơ̆m tơ pôl. Kăn ƀô̆ jang pơ gang tơ̆ tơ ring hơ len năng jơ hngâm pran bơ ngai oei hơ drô̆ rim năr, pơ tŏ hơ yuh hơ kâu 2 vât 1 năr, jang ‘lơ̆ng dôm trong jang tang găn jĭ kiơ̆ tơ drong hơ găt đơ̆ng Anih tơm vei lăng jang pơ gang.

Dơ̆ng: Tơ blơ̆