VOV4.Bahnar – Jing tơring tơkuh hăm plei tơm Đà Lạt, anih đei lơ bơngai ƀơm jĭ Covid-19 hloh kơ dêh char Lâm Đồng, mă lei gơnơm chĕp vei tơdrong tơguăt tơguăl lơ̆m tơdrong tang găn păng tơjră pơrang jĭ, apŭng Lạc Dương duh oei jing “tơrign xơđơ̆ng” tam mă đei bơngai yơ ƀơm jĭ Covid-19. Vă pơtoi vei xơđơ̆ng tơdrong âu, kon pơlei tơ̆ dôm pơlei pơla tơ̆ âu tŏk bŏk oei akŏm khul vei lăng kơdih tơ̆ tơring xơđơ̆ng, axong bơngai vei hơlen măng năr vă băt hơdăh dôm tơdrong vih vơ̆t oei xa lơ̆m tơring kon pơlei.

Khei năr âu ki, ‘năr tô̆ dăh mă ‘mi, hloh mơjĭt ‘nu jang lơ̆m Khul vei hơlen kơdih tơring xơđơ̆ng kơ thôn 1, xăh Đạ Sar, apŭng Lạc Dương (Lâm Đồng) duh hơnơ̆ng pơtoi pơm jang tơnăp tơdrong tang găn păng tơjră pơrang jĭ Covid-19 kơ po. Kơtă ăh kơ̆l trong bê tông mơ̆t truh tơ̆ thôn hơnơ̆ng đei bơngai gak hơlen măng năr vă hơlen tơdrong mơ̆t lĕch, mă hăt noh dôm tong gre păng bơngai vih vơ̆t đơ̆ng tơring nai truh. Ƀok Păng Ting Doanh, kơdră Khul vei hơlen ăn tơbăt, mă tơdrong jang hrat mă lei đe ‘nhŏng oh lơ̆m khul jang adoi axong jơ ‘năr, pơlơh băl vă gak hơlen, vei xơđơ̆ng ăn tơdrong vei vêr tơring jơk – tơring xơđơ̆ng ưh đei pơrang jĭ Covid-19 ăn pơlei pơla: “Ăh đei bơngai đơ̆ng tơring nai truh noh ba chih hơdăh kơsô̆ gre, hơnăn, anih oei tơ̆ yơ. Găh tơdrong năm hơlen hơnơ̆ng noh đei pơm jang đơ̆ng đunh bơih. Kon pơlei tơ̆ âu pơm kiơ̆ tơnăp tơdrong tơroi tơbang y tê̆, pơm kiơ̆ pơkăp 5k, âu jing tơdrong hơ iă, da ƀiơ̆ kơ hrat ăn Khul jang tang găn păng tơjră pơrang jĭ Covid-19. Inh ‘meh vă noh athei pơtoi păng pơih xă trong jang âu vă vei xơđơ̆ng tang găn păng tơjră pơrang jĭ tơnăp, kơdih po kơyuơ kơ rim bơngai”.

Xăh Đạ Sar, apŭng Lạc Dương tơkuh hăm plei tơm Đà Lạt, oei ăh jih jăl trong tơm 27C noh rim năr đei lơ bơngai đơ̆ng tơring nai mơ̆t lĕch. Ƀok Phạm Ngọc Giáo, tơ̆ phương 9, plei tơm Đà Lạt, bơngai hơnơ̆ng vih vơ̆t găn anih gak hơlen pơrang jĭ Covid-19 âu ăn tơbăt, kơyuơ đei pơgar jang lơ̆m tơring âu noh rim năr ƀok păng lơ bơngai đơ̆ng tơring nai truh tơ̆ âu. Rim ‘măng vih vơ̆t noh athei tơroi tơbang y tê̆ tôm tong, mă hiong jơ ră mă lei âu jing tơdrong kăl. Ƀok Giáo ăn tơbăt: “Thoi noh tôch ‘lơ̆ng, kơlih ba athei kơyuơ kơ tơpôl kon pơlei noh nĕ lê̆ đei tơdrong ưh ‘lơ̆ng kơyuơ đơ̆ng po. Hăm kơdih po inh noh jing minh tơdrong tơnăp lơ̆m khei năr pơrang jĭ hơbuh âu, kơlih hăp trŏ ƀlep. Dang ei pơrang jĭ ưh đei um ai, pơnĭk âu to, bu băt hăp tơ̆ yơ  tang găn noh jing ‘lơ̆ng hloh”.

Ưh adrô̆ xăh Đạ Sar, rim thôn, pơlei, kueng kơphô̆ kơ dôm xăh, thĭ trâ̆n tơ̆ apŭng Lạc Dương adoi akŏm khul vei lăng tơring xơđơ̆ng, tơring ưh đei ƀơm pơrang Covid-19 păng đei kon pơlei lăp đon tơgŭm. Kiơ̆ pơmai Kơ Să Ka Liêm, Ƀĭ thư Đoàn xăh Đạ Nhim, adrol âu ki kon pơlei tam mă băt hơdăh păng tam mă tơnăp lơ̆m tơdrong pơm kiơ̆ dôm tơdrong pơkăp tang găn păng tơjră pơrang jĭ Covid-19. Đơ̆ng năr tơ iung pơjing khul vei lăng tơring xơđơ̆ng, rim bơngai jang hơtŏk pran tơroi tơbăt noh dang ei bu bu duh pơm kiơ̆ tơnăp tơdrong chô̆ che gom ƀŏ, tơroi y tê̆ rim ‘măng mơ̆t lĕch đơ̆ng tơring: “Pơjing anih dơ̆t hơlen noh mă blŭng tơnap tap mă lei đơ̆ng rŏng kơ noh tơroi tơbăt ăn kon pơlei hlôh vao hơdăh găh tơdrong tang găn păng tơjră pơrang jĭ noh duh ưh đei tơnap tap dang yơ. Dang ei kon pơlei, jô̆ hloi đe hơdruh tơdăm hlôi pơm kiơ̆ tơnăp tơdrong tang găn păng tơjră pơrang jĭ. Vei xơđơ̆ng tơdrong chô̆ che gom ƀŏ păng dôm tơdrong pơkăp 5k ƀơ̆t lĕch tơ̆ ‘nguaih”.

Lạc Dương jing apŭng đei lơ kon pơlei K’ho erih jang xa. Mă tơkuh hăm plei tơm Đà Lạt, tơring đei lơ bơngai ƀơm jĭ Coid-19 hloh lơ̆m dêh char mă lei Lạc Dương dang ei duh oei jing tơring tam mă đei bơngai yơ ƀơm jĭ Covid-19. Vă kĕ đei jơnei âu, ‘nguaih kơ tơdrong adrin atŭm đơ̆ng khul jang kơpal păng jơnŭm pơgơ̆r tơring, rim khul jang vei vêr tơring xơđơ̆ng tơ̆ rim pơlei pơla jing kăp gĭt, tơgop tih tên ăn tơdrong jang tang găn păng tơjră pơrang jĭ Covid-19 kơ Lạc Dương pơma adrô̆ păng Lâm Đồng pơma atŭm.

Lan chih păng pơre nơ̆r