VOV4.Bahnar - Tơ̆ hơ năp tơ drong krê hơ mơt đơ̆ng jĭ Covid-19, dêh char Lâm Đồng hơ nơ̆ng vei kơ jăp 15 anih gak hơ len năng jĭ tơ̆ dêh char. Kiơ̆ đơ̆ng nŏh, chă ƀôh lơ bơ ngai đei jâu tơ pŏh jĭ Covid-19 păng pơ gơ̆r ăn oei hơ drô̆ kiơ̆ tơ drong hơ găt.

Lâm Đồng tơ tom chă ƀôh 48 ‘nu bơ ngai F1 tơ̆ dôm anih gak tang găn jĭ Covid-19

Hlŏh 1 puăt khei ‘nâu, anih gak tang găn jĭ Covid-19 tơ̆ apŭng Đạ Huoai (Lâm Đồng), găh trong gre 20 tơ ƀưh Đà Lạt hăm plt HCM hơ nơ̆ng bơ̆ jang prăt măng, prăt năr. Yoa ‘nâu jĭ trong gre gĭt kăl tơ ƀưh dôm dêh char găh Pơ băh hăm Lâm Đồng kơ na kơ sô̆ gre, bơ ngai vih vât tôch lơ, yoa thoi nŏh khul jang đơ̆ng dôm anih jang kơ pal krao akŏm hlŏh 30 ‘nu bơ ngai, klăih song pơm 4 ka trư̆k vă gơ̆h tang găn ‘lơ̆ng tơ drong jĭ.

Dang ei jô̆ păh lăp 1 năr, Lâm Đồng đei hlŏh 6.500 tŏ gre vih vât, hăm dang 14.000 ‘nu bơ ngai yak vih vât tơ̆ dôm anih gak tang găn jĭ Covid-19. Đĭ đăng adoi pơm ‘lơ̆ng tơ drong khăm hơ len, pơ tŏ hơ yuh hơ kâu păng chih tơ roi găh jơ hngâm jăn. Kiơ̆ đơ̆ng noh, tơ tom chă ƀôh 48 ‘nu bơ ngai F1 păng pơ gơ̆r pơm hla ar ăn oei hơ drô̆ kiơ̆ tơ drong hơ găt.

Dơ̆ng: Tơ blơ̆