VOV4.Bahnar  – Pơgê năr 8/10, Lâm Đồng pơtoi ƀôh đei 30 'nu ƀơm jĭ Covid-19, lơ̆m noh đei 25 'nu tơrĕk truh anih hơbuh jĭ tơ̆ pơlei pơkao Vạn Thành, phương 5, plei tơm Đà Lạt.

Dang ei, Jơnŭm pơgơ̆r tang găn păng tơjră pơrang jĭ dêh char Lâm Đồng hlôi pơgơ̆r Anih jang hơlen pơrang jĭ dêh char Lâm Đồng păng dôm anih jang đei tơrĕk dăh tenh kuăng chă hơlen, chơ chă, pơkăp tơring, oei tơklăh, iŏk hơlen pơrang jĭ hăm dôm bơngai đei tơrĕk. 'Nguaih kơ anih hơbuh jĭ pơlei pơkao Vạn Thành, anih jang y tê̆ dêh char Lâm Đồng duh ƀôh đei 5 'nu ƀơm jĭ Covid-19 'nao, lơ̆m noh 2 'nu jing klo hơkăn bơngai vơ̆r gre chơ tơmam lơ̆m dêh char, 2 'nu chôt vih đơ̆ng plei tơm HCM păng bơngai nai noh chôt vih đơ̆ng dêh char Bình Dương. Thoi noh, jô̆ truh pơgê năr 8/10, Lâm Đồng ƀôh đei 322 'nu bơngai ƀơm jĭ Covid-19, lơ̆m noh đei 264 'nu hlôi đei hơmet klaih. Dang ei Lâm Đồng tŏk bŏk pơkăp oei tơklăh hăm 5.921 'nu, lơ̆m noh 95 'nu pơkăp oei tơklăh y tê̆, 3.180 pơkăp oei tơklăh minh ƀôt păng 2.646 'nu pơkăp oei tơklăh tơ̆ hnam.

Lan chih păng pơre nơ̆r