VOV4.Bahnar - Kĕ mong truh 3,2 triu m3 đak, vă tơ ruih ăn 600ha ‘nhot, ƀa, hơ ƀo, dơ nâu Proh găh xăh Pró, apŭng Đơn Dương (Lâm Đồng) oei dơ̆ng tơ̆ hơ năp tơ drong ưh sơ đơ̆ng lơ̆m pơ yan ‘mi, đak tih kơ lih yoa đe phă ngơ̆r.

Dơ nâu đak Proh, xăh Pró, apŭng Đơn Dương (Lâm Đồng) nhen vă hơ pơ chăh yoa đơ̆ng đe phă ngơ̆r. Trong pơm kơ pal bơ nơ̆ dơ nâu pơ chăh phê̆ phă, jing pŭng lŭng yoa gre tih chơ chuơh, tĕh kơ dâu mât lĕch. Kŭm hăm ‘nŏh, tơ drong tuh tĕh tơ ter dơ nâu đak kŭm đei hơ nơ̆ng pơm ăn dơ nâu jing ưh sơ đơ̆ng. Đĭ đăng dôm tơ drong ‘nâu đei hơ nơ̆ng đunh khei ‘năr, mă lei khul kơ dră tơ ring păng anih jang kơ pal oei tam mă đei trong jang yơ vă găn, hơ met pơ ‘lơ̆ng, ƀât lăp chă sek tơ lang nhen vă pơ trŏ đĕch.

Kon pơ lei ăn gre chưk, ƀŭ kơ lơ̆p tĕh tơ gar jih dơ nâu đak Proh

Ƀok Đỗ Phú Hòa, Kăn ƀô̆ vei lăng – iŏk yoa dơ nâu đak Đơn Dương, bơ ngai vei lăng dơ nâu Proh ăn tơ băt, rim ‘măng ƀôh bơ ngai phă ngơ̆r dơ nâu ‘nŏh anih pơm hla ar păng athei khul kơ dră tơ ring sek tơ lang. Mă lei, lơ tơ drong tih tơ tă pơ dui đunh ngăl, sek tơ lang nhen vă pơ trŏ đĕch kơ na tơ drong phă pơ răm, tuh tĕh tơ ter dơ nâu Proh jing ưh kĕ vei lăng.

Ƀok Đỗ Phú Hòa tơ roi, dang ei đei tŏ sĕt hlŏh ‘nŏh 35 unh hnam tơ gar iŏk tĕh tơ ter bơ nơ̆ găn đak kơ dơ nâu âu: “Pơ ma atŭm lơ̆m tơ drong vei lăng dơ nâu, dôm tơ drong đei ƀôh tơ̆ âu đa ƀơm lơ tơ drong. Tơ dăh đei tơ drong mă bơ̆n ưh đei sek tơ lang tơ păt gô jing đei đunh păng sek tơ lang roi mơ mat. Hrei ‘nâu, tĕh roi tŏk kơ jă, dôm tơ drong glăi đei hơ nơ̆ng. Tơ dăh ưh đei sek tơ lang tơ păt ‘lơ̆ng ‘nŏh gô đei hơ lơ̆k dơ̆ng, tôch mơ mat ăn tơ drong vei lăng dơ nâu”.

Tơ ƀôh ăn tơ drong sek tơ lang nhen vă pơ trŏ, ưh đei kơ hret đơ̆ng khul kơ dră chĕp kơ̆l xăh Pró ‘nŏh jĭ tơ drong tuh tĕh tơ gar iŏk jih dơ nâu Proh đei lơ̆m ‘năr 11/4/2021. Mưh ƀôh ƀok Nguyễn Xuân Hải, oei tơ̆ thĭ trơ̆n Thạnh Mỹ, apŭng Đơn Dương ăn gre tuh, chưk hơ met tĕh, tơ gar iŏk tĕh tơ ter dơ nâu, Anih vei lăng – iŏk yoa dơ nâu đak Đơn Dương pơ gơ̆r găn, athei Dơ nŏ anih vei lăng kon pơ lei xăh Pró pơm hla ar păng sek tơ lang. Mă lei truh dang ei, ‘ngoăih kơ nôp jên phak 200 rơ bâu, bơ ngai pơm glăi oei tam mă kôch hơ met ming tĕh, vă pơ dreu dơ̆ng hơ găt tĕh mă sư vă tơ gar iŏk ‘nŏh. Pơ ma găh tơ drong hiơ̆ hyĭn âu, ƀok Châu Văn Kỳ, Kơ dră vei lăng kon pơ lei xăh Pró pơ ma hơ dăh, ưh đei tơ drong ver kiơ, dăh mă pơm pơ hơi lê̆ đunh ôh. Ƀok ‘nao đei năm jang 2 khei ‘nâu kơ na rim tơ drong oei tam mă băt tôm.

Ƀok ăn tơ băt vă sek tơ lang kĕh hrôih tơ drong ‘nâu tơ̆ hơ năp kơnh: “Gơ nơm đei dơ nâu âu mă đei đak tơ ruih đơ̆ng âu truh tơ̆ xăh păih to kơ bơ̆n ƀôh tôch gĭt kăl, mă lei tơ drong mơ mat tat hlŏh dang ei ‘nŏh pơm thoi yơ vă chă ƀôh păng sek tơ lang đơ̆ng blŭng hloi, yoa bơ ngai ‘nâu tơ gar iŏk tĕh đei ‘nŏh bơ ngai to gơ̆h pơm kiơ̆ ‘năi. Kơ na trong jang đơ̆ng rŏng dơ̆ng, tơ dăh bơ ngai âu pơm glăi dơ̆ng ưh jor gô đei sek tơ lang tôch tơ păt”.

Tơ̆ hơ năp tơ drong dơ nâu đak Proh đei đe tuh tĕh tơ gar iŏk jih bơ nơ̆, Anih vei lăng – iŏk yoa dơ nâu đak Đơn Dương lơ ‘măng đei hla ar chih athei anih jang kơ pal tơ gŭm, găn ưh ăn gre tih kơ dâu kơ pal bơ nơ̆. Atŭm hăm ‘nŏh, athei khul kơ dră tơ ring sek tơ lang tơ păt dôm tơ drong pơm glăi, phă ngơ̆r dơ nâu, tơ gar iŏk tĕh tơ̆ jih dơ nâu. Yoa mưh lê̆ tơ drong ‘nâu đei hơ nơ̆ng ‘nŏh gô pơm ưh ‘lơ̆ng truh tơ drong vei lăng, iŏk yoa dơ nâu păng pơm ưh sơ đơ̆ng ăn dơ nâu đak lơ̆m pơ yan ‘mi âu kơnh.

Dơ̆ng: Tơ blơ̆