VOV4.Bahnar - Năr 6/10, Dơno anĭh vei lăng kon pơlei dêh char Lâm Đồng ‘nao chĭh pơtrŭh hla bơar athei rim hơnĭh bơ̆ jang păng Dơnŏ anĭh vei lăng kon pơlei rim apŭng, pơlei tơm lơm dêh char hơmet ăn ƀet vaccine tang găn jĭ Covid-19 ăn lơ bơngai.

Lâm Đồng tŏk bŏk pơjing trong jang ƀet vaccine tang găn Covid-19 ăn lơ bơngai

Dơnŏ anĭh vei lăng kon pơlei dêh char Lâm Đồng pơjao ăn Dơnŏ anĭh vei lăng jang pơgang dêh char pơm tơm, iung jang hơdoi hăm rim hơnĭh bơ̆ jang ƀơm trŭh păng Dơnŏ anĭh vei lăng kon pơlei rim apŭng, pơlei tơm lơ̆m dêh char pơjing trong jang, hơmet ăn tơmam drăm, kmăi kmŏk, bơngai jang tơlĕch jang ƀet vaccine đơ̆ng dang ei trŭh đĭ sơnăm 2021. Atŭm hăm ‘nŏh, iung jang dăr lăng, chĭh hơnăn rim bơngai kăl vă ƀet hơdrol kiơ̆ tơdrong tơchơ̆t. Dêh char ‘nao sơng iŏk đei 200.000 kơliêu vaccine Vero Cell kơ yuơ Dơnŏ anĭh tơm vei lăng jang pơgang klăh asong păng tŏk bŏk iung jang ƀet jrŭm mă 1 tơ̆ rim apŭng, pơlei tơm lơ̆m dêh char. Atŭm hăm hlŏh 233.000 kơliêu vaccine hlôi đei ƀet bơ̆ng hơdrol kơ ‘nŏh păng trong vă jang klăh asong rim vaccine Covid-19 lơ̆m khei năr kơnh, trŭh vă đĭ sơnăm au, Lâm Đồng gô ƀet đang ăn 70% măt bơngai hlŏh 18 sơnăm đei ƀet bơ̆ng.

Tơblơ̆ nơ̆r: Amazưt