VOV4.Bahnar - Jô̆ truh 9h pơ gê (23/5), dêh char Lâm Đồng đei hlŏh 281 rơ bâu ‘nu bơ ngai tăh hla năm pôk rơih, iŏk đei vă jê̆ 30% kơ sô̆ bơ ngai tăh hla lơ̆m dêh char. Đơ̆ng rŏng kơ pơm lêh chao Kơ, đĭ đăng 1.110 anih tăh hla kơ dêh char Lâm Đồng vang tăh kơ phĭu pôk rơih bơ ngai tang măt Kuôk hô̆i jăl XV păng Jơ nŭm pơ gơ̆r kon pơ lei jơ̆p tơ ring đơ̆ng 2021 – 2026. Đơ̆ng rŏng 2 jơ, đei hlŏh 281 rơ bâu ‘nu bơ ngai tăh hla năm pôk rơih, iŏk đei vă jê̆ 30% kơ sô̆ bơ ngai tăh hla lơ̆m dêh char. Tơ̆ dôm anih tăh hla, tơ drong pôk rơih đei pơ gơ̆r sơ đơ̆ng ‘lơ̆ng, dôm bơ ngai tăh hla pơm kiơ̆ ‘lơ̆ng tơ drong hơ găt 5K vă tang găn jĭ Covid-19.

Bơ ngai tăh hla hơ drĕch K’ho hơ la jơ̆ng kông Langbiang, thĭ trơ̆n Lạc Dương (Lâm Đồng)

Tơ̆ anih tăh hla kơ sô̆ 5, thĭ trơ̆n Lạc Dương, apŭng Lạc Dương (Lâm Đồng), kon pơ lei K’ho tơ̆ âu vang năm tăh hla đơ̆ng rŏng kơ pơm lêh ‘năi. Bơ ngai tăh hla Liêng Hót Ha Tuyên, 60 sơ năm, tơ̆ plei Đăng Gia Dềt B, thĭ trơ̆n Lạc Dương tăh hla đang, chơt hơ iă pơ ma: “Năng hơ năn păng bơ̆n athei tơ chĕng hơ len vă pôk rơih ăn bơ ngai bu. Lui bơ ngai yơ ‘nŏh bơ̆n rơih bơ ngai ‘nŏh! Hơ pơi ‘mĕh bơ ngai rơ gei, đei đon ‘lơ̆ng gô đei pôk rơih vă pơ vih ăn kon pơ lei, athei jang yoa đảng, yoa tĕh đak, yoa kon pơ lei! Đon hơ pơi ‘mĕh đơ̆ng inh ‘nŏh thoi noh”.

Dơ̆ng: Tơ blơ̆