VOV4.Bahnar - Đơ̆ng rŏng lơ ‘măng asong pơđunh khei ‘năr, trŭh dang ei, tơdrong yŭih hut kơ hrĕng hektar hnam pơnĭl pơm glăi lơ̆m hơgăt tĕh bri kơ Lâm Đồng oei tim mă iung jang.

Kiơ̆ đơ̆ng Dơnŏ anĭh bơ̆ jang tơdrong au kơ dêh char Lâm Đồng dăr lăng, lơ̆m dêh char đei 227 ha hnam pơnĭl, hnam hơdrau tơ iung pơjing glăi lơ̆m hơgăt tĕh bri. Lơ̆m au akom lơ tơ̆ pơlei tơm Đà Lạt hăm vă jê̆ 185ha, kiơ̆ đơ̆ng rŏng ‘nŏh apŭng Lạc Dương hloh 21ha, Đơn Dương 16ha, pă dôm yơ răh rap lơm rim apŭng Đức Trọng, Đam Rông păng Di Linh. Mă đơ̆ng hơdrol kơ ‘nŏh Dơnŏ anĭh vei lăng kon pơlei dêh char Lâm Đồng hlôi chĭh pơtrŭh hla bơar pơrô̆ athei rim apŭng, pơlei tơm păng hơnĭh jang đei ƀơm trŭh iung jang yŭih hut keh đang hơdrol năr 30/9/2021, mă lei trŭh dang ei, lơ̆m hơgăt tĕh hnam pơnĭl, hnam hơdrau hlôi yŭih hut tim mă trŭh 10%. Kiơ̆ đơ̆ng Dơnŏ anĭh vei lăng Chŏh jang sa păng atŏk tơ iung tơring tơrang dêh char Lâm Đồng, tơdrong tơm pơm ăn hiơ hiơ̆ au ‘nŏh kơ yuơ rim tơdrong tơchơ̆t hơmet pơ ‘lơ̆ng tơnap tap, kon pơlei tŏk bŏk jang sa kơna kăl đei đunh jơ ‘năr vă pơtho khan, athei đe sư pơm kiơ̆.

Tơblơ̆ nơ̆r: Amazưt