VOV4.Bahnar - Pơ gê 26/3, Jơ nŭm pơ gơ̆r kon pơ lei dêh char Lâm Đồng jăl IX pơ gơ̆r hop akŏm mă 18 vă hơ len năng dôm tơ drong tơ chơ̆t gĭt kăl găh jang atŏk tơ iung mŭk drăm, tơ pôl tơ̆ tơ ring.

Lơ̆m hop akŏm, dôm bơ ngai tang măt hơ len năng, pơ ma nuh păng drơ̆ng nơ̆r ăn dôm tơ drong tơ chơ̆t gĭt kăl găh tơ mât jên jang kơ tĕh đak, nhen: Tơ chơ̆t kiơ̆ ăn trong tơ mât jên jang, hơ met ming trong tơ mât jên jang ăn dôm tơ drong jang kơ tĕh đak; hơ met ming, tơ lĕch dơ̆ng trong tơ mât jên tĕh đak mong tơ̆ tơ ring sơ năm 2021; păng trong tơ mât jên jang kiơ̆ đơ̆ng jên Trung ương sơ năm 2021.

‘Măng hop akŏm mă 18 Jơ nŭm pơ gơ̆r kon pơ lei dêh char Lâm Đồng jăl IX

Mă loi, ‘măng hop akŏm âu oei set hơ len hla ar chih Tơ chơ̆t drơ̆ng nơ̆r ăn trong tơ mât jên jang pơm trong gre kơ dâu hrĕnh Tân Phú (Đồng Nai) - Bảo Lộc (Lâm Đồng) kơ jung truh 67km kiơ̆ trong jang hơ doi đơ̆ng tĕh đak hăm kon pơ lei. Mưh tơ drong jang pơm trong gre kơ dâu hrĕnh âu đei pơm đang gô tơ ƀưh đei lơ trong gre kơ dâu hrĕnh nhen Dầu Giây – Đà Lạt kiơ̆ trong jang hlôi đei Thủ tướng tĕh đak kĭ ăn, pơ jing jơ hngâm pran vă jang atŏk tơ iung mŭk drăm, tơ pôl, vei lăng ‘lơ̆ng tơ drong sơ đơ̆ng tĕh đak tơ̆ dôm dêh char găh tơ ring Tây nguyên.

Dơ̆ng: Tơ blơ̆