VOV4.Bahnar -Vă vei sơ đơ̆ng tơ drong jang tang găn jĭ Covid-19 lơ̆m năr pôk rơ̆ih, Anih vei lăng găh tơ drong jang pơ gang dêh char Lâm Đồng hlôi đei hla ar athei rim Hnam pơ gang, hơ nih khăm hơ met jĭ lơ̆m tơ ring hơ met ăn bơ ngai jang, vă hơ met pơ ‘lơ̆ng, tơ jră hăm dôm tơ drong mư̆h đei ƀôh. Anih vei lăng găh tơ drong jang pơ gang dêh char Lâm Đồng hlôi athei rim hnam pơ gang tơ̆ dêh char; hnam pơ gang rim apŭng, pơ lei tơm păng Hnam pơ gang Đa khoa Hoàn Mỹ Đà Lạt, rim anih jang pơ jing 1 grŭp kâp kư̆u đei hloi đe ƀak si, điều dưỡng păng bơ ngai huơ̆r gre, đei tôm pơ gang, gre kâp kư̆u, xe chơ bơ ngai jĭ vă tơ gŭm tơ tom ăn kơ rim apŭng, pơ lei tơm păng xăh, phường, thị trấn.

Kang ƀô̆ jang pơ gang tơ̆ tơ ring tŏk bŏk hơ met ăn che gom, đak ôp ti tơ̆ hơ nih tăh kơ phiê̆u

Hơ dai hăm ‘noh, tơ roi tơ băt điên thoăi kăl đơ̆ng anih jang ăn kơ rim xăh phường, thị trấn păng rim Khŭl vei lăng pôk rơ̆ih lơ̆m dêh char vă tơ tom sơng iŏk kơ tơ̆ng ang mư̆h kăl. ‘Ngoăih kơ ‘noh, rim anih jang pơ gang lơ̆m dêh char athei hơ tŏk pơ đĭ rim khŭl jang tơ jră hrĕnh, bơ̆ jang kiơ̆ ‘lơ̆ng rim trong jang tang găn jĭ Covid-19 mư̆h đei tơ drong đei ƀôh. Anih jang kŭm hlôi hơ vơn hloh 1.100 ‘nu kang ƀô̆ jang pơ gang bơ̆ jang tơ̆ đĭ đăng rim hơ nih pôk rơ̆ih vă kơ chăng tang găn jĭ.

Thuem: Tơ blơ̆