VOV4.Bahnar - Hăm tơ drong pran rong ka đak tơ ngiĕt đei iŏk yua mŭk drăm lơ, hrei ‘nâu 1,2 anih jang mơ dro sa lơ̆m dêh char Lâm Đồng hơ nơ̆ng hơ tŏk tơ iung tơ drong jang rong ka tầm kiơ̆ trong iŏk kơ tăp. Anih vei lăng găh choh jang sa păng hơ tŏk tơ iung tơ ring tơ rang Lâm Đồng tơ băt: Dang ei tơ̆ 1,2 anih jang mơ dro sa lơ̆m dêh char nhen Kŏng ti Cá tầm Việt Nam, Kŏng ti TNHH Cá suối Đại Dương, Kŏng ti TNHH Phi Huỳnh tŏk bŏk rong ka đak tơ ngiĕt hlôi hơ tŏk tơ iung tơ drong jang rong ka tầm kiơ̆ trong iŏk kơ tăp. Jô̆ pơ hlom kơ tăp rim sơ năm đei dang 1.500 kĭ. Kơ jă kơ tăp ka tầm Lâm Đồng lơ̆m anih tĕch mơ dro đei kơ jă jô̆ păh lăp dang 35 triệu hlak jên 1 kĭ hlôi đei lơ anih tĕch mơ dro tơ mam et sa tơ mơ̆t lơ̆m hơ năn chih tơ mam pơ yua ăn tơ moi.

Thuem: Tơ blơ̆