VOV4.Bahnar - Dơnŏ anĭh chĕp pơgơ̆r mŭk drăm dêh char Lâm Đồng hlôi pơgơ̆r hop akŏm tơlĕch jang bơ̆ jang dăr lăng mŭk drăm păng bơ̆ jang dăr lăng hơnĭh bơ̆ jang sơnăm 2021.Kiơ̆ đơ̆ng Dơnŏ anĭh Chĭh jô̆ dêh char tơbăt, jô̆ trŭh khei 4/2021 lơ̆m dêh char hlôi tơlĕch jang dăr lăng 2.158 lơ̆m akŏp 8.659 hơnĭh mơdro sa tơm, iŏk jơnei 33%. Hăm hơnĭh bơ̆ jang tĕh đak lơ̆m dêh char hlôi tơlĕch jang dăr lăng 519/519 hơnĭh bơ̆ jang, jơnei 100% ... Lăng atŭm bơ̆ jang dăr lăng đei sơđơ̆ng ‘lơ̆ng hơ iă, dôm tơdrong au to đei tôm tong păng bơ̆ jang dăr lăng đei jang kiơ̆ ƀlep tơdrong tơchơ̆t. Mă lei tơ jê̆ ‘nŏh, oei đei mĭnh ƀar tơdrong tim mă ‘lơ̆ng nhen trong tơlĕch jang dăr lăng tơ̆ mĭnh ƀar tơring oei hiơ hiơ̆, mĭnh ƀar kơ phĭu dăr lăng hơlen đei ƀơm trŭh hơnĭh mơdro sa, hơnĭh bơ̆ jang oei đei glăi lơ̆m tơdrong kih thuơ̆t. Khei năr kơnh, Dơnŏ anĭh chĕp pơgơ̆r dăr lăng gô hơnơ̆ng atŏk kơtang iung jang dăr lăng, pơrô̆ athei rim hơnĭh jang kiơ̆ tơbăt hơdăh dôm tơdrong mă tôm, vă jang keh đang ‘lơ̆ng ‘măng bơ̆ jang dăr lăng mŭk drăm sơnăm 2021 lơ̆m dêh char Lâm Đồng.

Tơblơ̆ nơ̆r: Amazưt