VOV4.Bahnar - Hơ nơ̆ng bơ̆ jang tơ ƀâp bơ ngai tăh hla đơ̆ng rŏng kơ hop akŏm mă 2, Kuô̆k hô̆i jăl XV, pơ gê (16/11), ƀok Phan Đình Trạc, Kơ dră jang lơ̆m Anih tơm Chinh trĭ, Bí thư Trung ương Đảng, Kơ dră chĕp kơ̆l Ban Nội chính Trung ương păng dôm bơ ngai tang măt Kuô̆k hô̆i jăl XV dêh char Lâm Đồng đei jơ tơ ƀâp bơ mngai tăh hla tơ̆ xăh Lát, apŭng Lạc Dương.

Lâm Đồng vă sek tơ lang kĕh dôm nơ̆r pơ ma athei đơ̆ng bơ ngai tăh hla

Tơ̆ jơ tơ ƀâp, dơ̆ng tang ăn Khul tang măt Kuô̆k hô̆i dêh char Lâm Đồng, Kơ dră chĕp kơ̆l Ban Nội chính Trung ương Phan Đình Trạc tơ chĕng ‘lơ̆ng dôm nơ̆r pơ ma tôch lăp hăm yăn âu đơ̆ng bơ ngai tăh hla. Tơl tơ blang, pơm hơ dăh dơ̆ng 1,2 tơ drong ƀơm truh tơ drong tơ gŭm đơ̆ng rŏng kơ klăih đơ̆ng tơ nuh hin, vă vei lăng ‘lơ̆ng ăn tơ drong klăih đơ̆ng tơ nuh hin kơ jăp; tơ drong tơ gŭm hăm kăn ƀô̆ tơ̆ xăh, mă loi jĭ kăn ƀô̆ jang tơ gĕch, kăn ƀô̆ tơ̆ pơ lei pơ la. Atŭm hăm ‘nŏh pơ ma hơ dăh, đơ̆ng rŏng kơ tơ ƀâp âu, khul tang măt Kuô̆k hô̆i Lâm Đồng vă pơ jing tơ drong ‘lơ̆ng pơ truh rim nơ̆r pơ ma apinh đơ̆ng bơ ngai tăh hla ăn anih jang kơ pal vă jăh sek tơ lang păng tơ tơl tơ blang mă tơ găl.

Dơ̆ng: Tơ blơ̆