VOV4.Bahnar -  Dôm năr âu, tơdrong xir kôch tơmo glăi tơ̆ tơring tơkuh hăm xăh Tà Nung, plei tơm Đà Lạt păng xăh Mê Linh, apŭng Lâm Hà, dêh char Lâm Đồng  đei ƀôh lang xă dơ̆ng. Lơ tơring groi noh ƀơm chôk xir pơgoh vă iŏk teh păng tơmo, lơ̆m kơplăh jơnŭm pơgơ̆r tơring pơhơi păng ưh đei tơnăp. Tơgăl kơ pơma noh xơnăm xơ̆, Anih vei lăng kon pơlei dêh char Lâm Đồng hlôi tơchơ̆t phak lơ anih jang mŭk drăm xir iŏk glăi tơmo, mă lei tơdrong mă âu adoi oei ƀôh hơnơ̆ng đĕch.

Truh tơring Bãi Sậy, lơ̆m tơring teh kơ thôn 4, xăh Tà Nung, plei tơm Đà Lạt ăh năr 10/5, ƀôh đang măt nhôn noh groi teh bri lơ̆m tơring hlôi ƀơm chôk kôch pơgoh vă iŏk tơmo, teh pă đei 'lơ̆ng tơ̆ yơ bơih. Dôm tơdrong jang âu noh glăi mă lei đei ƀôh hơdăh hloi. Rim bơngai jang thuê tơ̆ âu ăn tơbăt, khei năr âu ki, phơ phŏ đei kang ƀô̆ xăh mơ̆t lĕch, chŏng mă tơdrong xir kôch tơmo kơ đe xư duh đei ƀôh hơnơ̆ng. Oei ƀok Phan Quang Trung, tơ̆ kueng 14, thôn 4, xăh Tà Nung, bơngai đei lăng jing dơnơm pơgơ̆r tơdrong xir iŏk tơmo glăi lơ̆m tơring âu tơblang, kơyuơ ưh đei tơdrong jang păng ưh đei bơngai chă tơkêng noh xư pơtơm xir kôch iŏk tơmo glăi: “Đe duh ưh đei pơm trong hiôk kiơ ôh mă lei ba duh hơnơ̆ng xir kôch kơlih duh ưh đei bơngai chă tơkêng kiơ ôh, pơma hơdăh thoi noh. Xăh đei truh dôm 'măng rôp gre, đơ̆ng rŏng kơ xek tơlang đang bơih noh 'nhăk gre vih. Akhan noh pơdăh tơdăng, mă lei pơdơh noh ba ưh kơ băt vă jang kiơ noh pơtơm iŏk tơmo vă jang dơ̆ng”.

Đơ̆ng chă hơlen băt, 'nguaih kơ tơdrong xir tơmo iĕ, noh tơdrong chôk teh kông vă iŏk tơmo glăi duh đei ƀôh lang xă lơ̆m tơring. Kiơ̆ kơ ƀok Liêng Hót Quil, Kang ƀô̆ jang găh teh  – choh jang xa – ming man – cham char xăh Tà Nung, dôm bơngai xir iŏk chuơh tơmo, nhen lĕ băt adrol rim tơdrong năm hơlen, noh hơnơ̆ng klenh tơtom: “Tơnap tap noh rim 'măng 'nhŏng oh năm hơlen noh đe xư adoi băt adrol bơih, nhen lĕ đe xư hơnơ̆ng đei bơngai hơlen tơ̆ âu. Ăh nhôn năm truh tơ̆ anih kơlih đe xư hlôi băt noh pơdơh tôm tơdrong hloi”

Oei kiơ̆ kơ ƀok Kră Jăn Ha Djiệp, Phŏ Kơdră Anih vei lăng kon pơlei xăh Tà Nung, plei tơm Đà Lạt, adrol kơ noh, xăh hlôi lơ 'măng chih hla bar pơkăp phak hrŭ hanh chĭnh găh tơdrong xir kôch tơmo glăi tơ̆ tơring Bãi Sậy âu, mă lei xek tơlang đang, khul jang jăk vih noh tơdrong xir kôch ƀôh dơ̆ng. 'Nâu jing tơdrong đei ƀôh pơngơ̆t kơ đon pơm hăm jơnŭm pơgơ̆r tơring: “Tơnap kơ tơring noh tơdrong xek tơlang ưh kơ hiôk. Xek tơlang đang minh ƀar giĕng đơ̆ng rŏng kơ noh đe xư truh xir kôch dơ̆ng. Pơma hơdăh noh, nhôn jang tơpăt hloi, oei 'nguaih kơ bơngai nai noh nhôn ưh kơ băt. 'Nâu jing hla bar chih pơkăp âu, nhôn hlôi xek tơlang dôm 'măng bơih”.

Kiơ̆ hla bar chih pơkăp mă Anih vei lăng kon pơlei xăh Tà Nung tơbang, tơchơ̆t phak pơm yoch hanh chĭnh găh tơdrong xir kôch tơmo păng tơdrong jang găh teh lơ̆m khei năr tơjê̆ âu mă hăt noh tơ̆ tơring Bãi Sậy noh ăh năr 5/1/2021. Thoi noh, hloh 5 khei pơtoi kơ noh, tơdrong chă hơlen, xek phak xir kôch tơmo glăi tơ̆ âu hlôi ƀôh hơdăh păng lang xă.

Tơ̆ tơring tơkuh đơ̆ng xăh Tà Nung, plei tơm Đà Lạt păng xăh Mê Linh, apŭng Lâm Hà dang ei oei đei 4 anih xir kôch tơmo 'măn ăn tơdrong ming man. Lơ̆m noh đei hloi anih xir kôch, oei lơ̆m hơgăt teh choh jang xa. Kiơ̆ kon pơlei tơ̆ tơring, tơdrong xir iŏk tơmo vă ming man âu glăi khôi luơ̆t pơkăp đei ƀôh đơ̆ng lơ xơnăm kơ âu, pơm ăn tơring jing tơpĕ tơpŏ păng hli truh tơdrong hơlih teh ƀơ̆t 'mi tih. Tơdrong chơ tơmo lĕch đơ̆ng anih xir iŏk âu duh hli hlơt găh trong nơnăm, pơrăm kơnê̆ trong vih vơ̆t yuơ kon pơlei kơdih tơgop hơmet ming.

Adrol kơ noh, Anih vei lăng kon pơlei dêh char Lâm Đồng hlôi đei lơ hla bar pơgơ̆r dôm anih jang kơpal hơtŏk tơdrong vei lăng găh pơm jang xir kôch tơmo gĭt, khŏm mă xek tơlang tơnăp dôm bơngai, anih jang pơm yoch găh xir kôch tơmo gĭt glăi.

Năr 17/12 xơnăm xơ̆, Anih vei lăng kon pơlei dêh char Lâm Đồng duh hlôi tơlĕch tơchơ̆t phak tơdrong pơm yoch hanh chĭnh hăm 5 anih jang mŭk drăm pơm jang găh tơdrong xir kôch tơmo gĭt hăm lơ anih pơm yoch noh: Anih jang Hưng Nguyên, Anih jang Hà Thanh, Anih jang ming man tĕch pơdro Hà Hưng, Anih Axong jang păng xir tơmo gĭt Đức Phú, Anih jang kiơ̆ Kôh phân Minh Định. Kơsô̆ jên dôm anih jang mŭk drăm tơ̆ kơpal ƀơm Anih vei lăng kon pơlei dêh char Lâm Đồng pơkăp phak hrŭ yuơ pơm yoch găh tơdrong xir kôch tơmo gĭt noh hloh 5,3 tih hlj. Thoi noh, tơdrong xir kôch tơmo gĭt glăi dang ei duh oei ƀôh lang xă tơ̆ tơring tơkuh đơ̆ng xăh Tà Nung, plei tơm Đà Lạt păng xăh Mê Linh, apŭng Lâm Hà.

Lan chih păng pơre nơ̆r