VOV4.Bahnar - Pơgê năr 20/10, tơ̆ pơlei tơm Đà Lạt, Khŭl kơdră tang măt Kuô̆k hô̆i dêh char Lâm Đồng hlôi vang hop akŏm mă 2, Kuô̆k hô̆i jăl XV ‘moi kiơ̆ trư̆k tuyên. Atŭm hăm dôm tơdrong atŭm lơ̆m tĕh đak, rim kơdră tang măt dêh char Lâm Đồng hlôi hơmet ăn vă pơtrŭh dôm nơ̆r tơgop, nơ̆r chă apĭnh đơ̆ng bơngai tăh hla lơ̆m dêh char găh dôm tơdrong đei ƀô̆h ư̆h kơ ‘lơ̆ng hơ iă kăl đei Kuô̆k hô̆i, Khŭl kơdră tĕh đak lăng trŭh, pơma dơnŭh xek tơlang vă tơtom hơmet pơ ‘lơ̆ng lơ̆m khei năr kơnh.

Ƀok Nguyễn Tạo, Kơ iĕng Kơdră Khŭl kơdră tang măt Kuô̆k hô̆i dêh char Lâm Đồng tơbăt, jĭ hơbŭh Covid-19 hlôi pơm kơnê̆ trŭh 2 hơnĭh jang mŭk drăm tơm kơ dêh char ‘nŏh chŏh jang sa păng tơmang pơ hiơ̆. Lơ̆m au, tơdrong hơmet pơ ‘lơ̆ng chŏh jang sa, sơđơ̆ng tĕch mơdro tơmam drăm chŏh jang sa, mă kăl rim ‘nhot-pơkao tŏk bŏk đei tơring hơmet pơ ‘lơ̆ng, tơlĕch iung jang, hơmet ming tơmam drăm lơ liơ mă ƀlep, lăp hăm tơdrong tĕch mơdro lơ̆m chăl hle.

Tơblơ̆ nơ̆r: Amazưt