VOV4.Bahnar - Dêh char Lâm Đồng pơ gơ̆r hop akŏm trư̆k tuyê̆n pơ tôch tơ drong jang tang găn sar bar păng chă dŏng bơ ngai răm sơ năm 2020 păng tơ lĕch tơ drong jang sơ năm 2021. Lơ̆m sơ năm 2020, mă đơ̆ng đei tơ drong sar bar ưh gan dêh ră mă lei lơ̆m dêh char kŭm hiong răm hlŏh 100 ti hlak jên.

Tŏ phang pơ đang kŭm pơm ưh măh đak ăn dang 1.300 ha ‘long pơ tăm tơ̆ dôm tơ ring lơ̆m dêh char. Sơ năm 2020, dêh char Lâm Đồng mong akŏm jên đơ̆ng tĕh đak, jên vă tang găn sar bar đơ̆ng dêh char păng jên tơ gŭm đơ̆ng Trung ương vă hơ met pơ ‘lơ̆ng hiong răm đơ̆ng sar bar tŏ ‘mi kial kơ nê̆.

Mă hơ dăh: Tơ lĕch hlŏh 72 ti hlak jên vă hơ met ming 13 anih pŭ răm đơ̆ng sar bar tŏ ‘mi kial kơ nê̆; tơ lĕch 6 ti hlak jên vă tơ gŭm ăn dôm tơ ring nai hơ met pơ ‘lơ̆ng hiong răm đơ̆ng sar bar. Lơ̆m hop akŏm dôm anih jang kơ pal păng tơ ring tơ rang chă roi tơ ƀôh dôm tơ drong oei tam mă lăp, tam mă ‘lơ̆ng kŭm nhen tơ lĕch lơ trong jang vă pơ gơ̆r jang ‘lơ̆ng tơ dỏng tang găn sar bar păng chă dŏng bơ ngai răm sơ năm 2021.

Dơ̆ng: Tơ blơ̆