VOV4.Bahnar - Năr 8/11, Lâm Đồng hơnơ̆ng đei ƀô̆h dơ̆ng lơ bơngai tơpŏh jĭ Covid-19 tơ̆ 7 apŭng, pơlei tơm lơ̆m dêh char. Kơdră tơring măh ăn pơdơ̆h rim tơdrong pơgơ̆r au to vă tang găn jĭ hơbŭh. Lơ̆m 20 ‘nu bơngai ‘nao tơpŏh jĭ Covid-19 tơ̆ Lâm Đồng, găh lơ dôm bơngai jĭ au đơ̆ng pơlei tơm HCM, Bình Dương păng Long An. Lơ̆m au, đei 8 ‘nu bơngai tơpŏh jĭ đơ̆ng găh ‘ngoăih kon pơlei, 1 ‘nu bơngai jĭ ‘noh drŏ kăn bơ̆ jang lơ̆m khŭl vơ̆r gre, ba tơmam drăm lơ hơnĭh lơ̆m tơring.

Lâm Đồng atŏk kơtang khăm hơlen, tơchă dôm bơngai đei ƀơm trŭh bơngai tơpŏh jĭ lơ̆m kon pơlei

Dang ei khŭl bơ̆ jang dêh char Lâm Đồng tĕnh koăng năm tơchă hơnĭh sư năm, vei lăng năng tông dôm bơngai đei ƀơm trŭh bơngai jĭ au. Atŭm hăm ‘nŏh, Lâm Đồng jei akŏm năm tơchă dôm bơngai đei ƀơm trŭh 52 ‘nu bơngai tơpŏh anai, găh lơ tơ̆ Đà Lạt, Đức Trọng, Di Linh păng pơlei tơm Bảo Lộc. Jô̆ lơ̆m 3 giĕng au ki, Lâm Đồng ƀô̆h đei 305 ‘nu bơngai tơpŏh jĭ Covid-19, atŏk măt bơngai tơpŏh jĭ lơ̆m dêh char trŭh 708 ‘nu. Tơ̆ hơnăp jĭ hơbŭh tơpŏh kơtang, dêh char Lâm Đồng tơchơ̆t ăn pơdơ̆h jang sa tĕch mơdro vă tang găn jĭ. Jô̆ trŭh dang ei, Lâm Đồng đei 708 ‘nu bơngai jĭ Covid-19, lơ̆m au đei 3 ‘nu bơngai lôch păng 454 ‘nu bơngai hlôi hơmet klăih păng ăn brŏk tơ̆ hnam.

Tơblơ̆ nơ̆r: Amazưt