VOV4.Bahnar - Truh dang ei, dêh char Lâm Đồng tam đei bơ ngai tơ po\h vi rus SARS-CoV-2.  Mă lei tơ\ hơ năp tơ drong krê hơ mơt đơ\ng j^, dêh char Lâm Đồng hlôi tơ le\ch lơ trong jang tang găn j^ Covid-19 tôch đei yoa, pơm ‘lơ\ng ăn tơ drong chă tơ mang lăng, 1 tơ drong jang tôch pran kơ dêh char.

Tơ\ dôm an^h chă tơ mang lăng đei ư hơ nhang kơ pơ lei tơm (plt) Đà Lạt nhen pơ gar pơ kao pơ lei tơm, Thu\ng thong tơ hưch… oei hơ nơ\ng sơng đei lơ bơ ngai truh tơ mang lăng. Mă lei đ^ đăng bơ ngai tơ mang lăng păng bơ ngai jang tơ\ âu tơ tă gom che gom tang găn j^ ngăl.

Lê Ngọc Anh, bơ ngai chă tơ mang lăng truh đơ\ng kuơ\n Cầu Giấy, plt Hà Nội tơ roi, adrol kơ năm tơ\ Lâm Đồng mo\ chă hơ len năng rim tơ drong găh j^ tơ\ dêh char âu. Mo\ ku\m hơ met tôm che gom, đak pơ gang pơ lôch pơ rang j^ mưh vă năm chă tơ mang lăng tơ\ âu. 

“Đà Lạt to\ ‘mi kial rơ ngơp ‘lơ\ng, mă 2 cham char tơ\ âu ku\m ‘lơ\ng ro\ ‘năi kơ na inh truh tơ mang lăng. Mưh truh tơ\ âu kơ dih kâu inh ku\m hli [iơ\ mơ\n, yoa an^h chă tơ mang lăng đei lơ bơ ngai đơ\ng lơ tơ ring pha ra băl, mă loi j^ bơ ngai te\h đak đe. Kơ na inh hơ nơ\ng gom muh măt mưh tơ [âp lơ\m tơ pôl”.

Vă pơm sơ đơ\ng jơ hngâm bơ ngai tơ mang lăng, dôm an^h tep pơ dơ\h tơ\ Đà Lạt răt hơ met tôm pơ gang, tơ mam yoa vă tang găn j^, păng bơ\ jang ‘lơ\ng dôm tơ drong chih tơ roi găh y te#. ‘Nho\ng Nguyễn Đình Quân Huy, Kơ dră che\p kơ\l An^h chă tơ mang lăng Green Land, tơ\ phường 3, plt Đà Lạt, ăn tơ băt: Đơ\ng ro\ng io\k đei nơ\r tơ roi găh j^ covid-19, an^h jang hlôi roi tơ băt trong tang găn j^ ăn bơ ngai jang păng hơ met tôm tơ mam kăl hai. 

“Vă tang găn j^ ‘lơ\ng [iơ\, inh pơ gơ\r pruih pơ gang pơ lôch pơ rang j^, [ơk che gom ăn tơ moi. An^h tep pơ dơ\h pơ jing 1 gru\p chă pơ to\ hơ len hơ yuh to\ tơ\ hơ kâu jăn tơ moi păng roi tơ băt hloi ăn khul kơ dră pơ gơ\r, an^h jang pơ gang tơ\ tơ ring mưh đei bơ ngai nhen thoi tơ po\h j^”.

Kiơ\ yă Nguyễn Thị Bích Ngọc, Pho\ Kơ dră An^h vei lăng jo\h ayo\ kơ do\ xoang, tơ plo\ng kơ dâu păng chă tơ mang lăng dêh char Lâm Đồng, kơ plăh dang ei, tơ drong jang g^t kăl hlo\h đơ\ng an^h chă tơ mang lăng Lâm Đồng ‘no\h athei jang kiơ\ mă ‘lơ\ng dôm nơ\r pơ tho găh tang găn j^ covid-19. Dêh char hơ nơ\ng tơ roi rim tơ drong găh tang găn j^ đơ\ng an^h jang kơ pal tơ le\ch vă tơ moi sơ đơ\ng jơ hngâm mưh truh tơ\ Lâm Đồng chă tơ mang lăng, pơ dơ\h ngôi. 

“Hrei ‘nâu trong păr đơ\ng dôm tơ ring truh tơ\ Đà Lạt oei jur kơ jă đơ\ng 30 - 50%, ‘nâu j^ tơ drong ‘lơ\ng vă dôm công ty chông ba tơ moi chă tơ mang lăng io\k yoa, jang xa. Nhôn hlôi bơ\ jang hăm dôm an^h chă tơ mang, pơ vih pơ văn nhen et xa, tep pơ dơ\h, chă tơ mang lăng đei lơ trong tơ gu\m vă tơ iung tơ drong chă tơ mang lăng. Pơ tih gia nhen 1,2 an^h chă tơ mang lăng tơ jur [iơ\ kơ jă ăn dôm an^h chông tơ moi truh”.

Dơ\ng: Tơ blơ\