VOV4.Bahnar - Anih vei lăng kon pơ lei dêh char Lâm Đồng ‘nao đei hla ar kăl athei pơ dơ̆h lê̆ ‘mơ̆i tơ drong thu iŏk jên tơ̆ rim anih BOT lơ̆m tơ ring vă tơ gŭm tơ drong jang tang găn jĭ Covid-19. Kiơ̆ kơ ‘noh, anih vei lăng kon pơ lei dêh char Lâm Đồng athei Kŏng ti Hùng Phát pơ dơ̆h ‘mơ̆i kơ thu jên iŏk yua trong nơ năm tơ̆ anih BOT Định An, apŭng Đức Trọng jô̆ đơ̆ng 12 jơ ‘năr dơ̆ng ‘năr 22/7 truh tŏk bŏk ‘măng ‘năr 1/8 truh. Khei ‘năr pơ dơ̆h thu iŏk jên gô đei ‘mong lơ̆m khei ‘năr thu iŏk jên đơ̆ng tơ drong jang pơm trong gre kơ dâu hrĕnh Liên Khương- jơ̆ng kông koĕch koĕl Preen. Kŭm hăm ‘noh, vă tơ gŭm kon pơ lei lơ̆m dêh char Lâm Đồng lơ̆m tơ drong năm vih vơ̆t, pơm tơ lĕch, tĕch mơ dro, pơm tơ drong hiôk pơ truh tơ tom dôm tơ mam đơ̆ng choh jang sa ăn rim tơ ring tŏk bŏk pơm kiơ̆ ư̆h kơ ăn năm vĭt vơ̆t lơ̆m tơ pôl kiơ̆ tơ chơ̆t 16 đơ̆ng Thủ tướng teh đak, mă loi ‘noh jĭ tơ̆ pơ lei tơm Hồ Chí Minh, Anih vei lăng kon pơ lei dêh char Lâm Đồng athei Anih vei lăng trong nơ năm Việt Nam set hơ len athei anih tơ mơ̆t jene jang kơ anih thu iŏk jên BOT tơ̆ xăh Liên Đầm, apŭng Di Linh bơ̆ jang kiơ̆ pơ dơh ‘mơ̆i tơ drong thu iŏk jên đơ̆ng anih jang.

Thuem: Tơ blơ̆