VOV4.Bahnar - Năr 3/5, Dơnŏ anĭh vei lăng kon pơlei dêh char Lâm Đồng hlôi chĭh pơtrŭh hla bơar kăl găh tơdrong pơdơ̆h bơ̆ jang mĭnh ƀar hơnĭh mơdro sa pơchơt pơ hiơ̆ vă jang kiơ̆ kơtang tơdrong jang tang găn jĭ Covid-19.

Khŭl bơ̆ jang găh au dêh charLâm Đồng dăr lăng bơ̆ jang tang găn jĭ tơ̆ cham gre păr Liên Khương

Kiơ̆ kơ ‘nŏh, đơ̆ng 7 jơ gơmăng năr 3/5, mĭnh ƀar hơnĭh mơdro sa ư̆h kơ măh kăl nhen kuan ƀar, karaoke, hơnĭh jŏh asoang, hơnĭh pơchơt điên tư hơmơt tơpŏh kơtang tơdrong jĭ Covid-19 lơ̆m dêh char Lâm Đồng pơdơ̆h jang hloi. Hăm rim hơnĭh mơdro sa anai gơ̆h ăn jang, Dơnŏ anĭh vei lăng kon pơlei dêh char Lâm Đồng athei kăl pơm kiơ̆ tôm tong tang găn jĭ. Hơdrô̆ tơmoi tơmang pơ hiơ̆, Dơnŏ anĭh vei lăng kon pơlei dêh char Lâm Đồng athei Kŏng ang dêh char pơm tơm, iung jang hơdoi hăm rim hơnĭh jang ƀơm trŭh atŏk kơtang dăr lăng, tơchă băt hơdăh măt bơngai tơmoi chă oei, tơtom ƀô̆h rim bơngai đei oei tơ jê̆ hăm bơngai tơpŏh jĭ Covid-19 tơdăh đei vă jang kiơ̆ ăn oei hơdrô̆ kiơ̆ tơdrong tơchơ̆t.

Tơblơ̆ nơ̆r: Amazưt