VOV4.Bahnar - ‘Năr 8/6, Anih vei lăng kon pơ lei dêh char Lâm Đồng hlôi tơ lĕch ăn hla ar kăl găh tơ drong ăn gre chơ chuĕn tơ moi hơ lơ̆k dơ̆ng mă lei athei pơm kiơ̆ tơ păt 1,2 trong jang tang găn jĭ Covid-19. Vă vei sơ đơ̆ng jang kiơ̆ đei yua tơ drong jang tơm hơ dai tơ mơ̆t yua hai rim trong jang tang găn jĭ Covid-19 hơ tŏk tơ iung mŭk drăm hai, Anih vei lăng kon pơ lei dêh char Lâm Đồng athei rim anih jang, khŭl grŭp, tơ pôl păng Anih vei lăng kon pơ lei rim apŭng, pơ lei tơm lơ̆m dêh char, jô̆ đơ̆ng 2 jơ kơ sơ̆ ‘năr 8/6, asong ăn gre chơ chuĕn tơ moi bơ̆ jang hơ lơ̆k dơ̆ng mă lei athei vei sơ đơ̆ng pơm kiơ̆ tơ păt dôm trong jang tang găn jĭ Covid-19.

Anih vei lăng kon pơ lei dêh char Lâm Đồng kŭm athei Anih vei lăng găh trong nơ năm gre kơ dâu rim dêh char, pơ lei tơm ƀơm truh vă drơ̆ng nơ̆r pơ tho dôm trong jang lơ̆m vei lăng gre kơ dâu, vei sơ đơ̆ng vei lăng hơ nih tơ poh jĭ mă lei ư̆h kơ chĭt trong yak vih vơ̆t, gơ̆t găn tơ drong tĕch mơ dro, ư̆h kơ pơm pơ găn dăh mă ƀơm ư̆h kơ ‘lơ̆ng truh tơ drong pơm tơ lĕch tĕch mơ dro; jang kiơ̆ ăn hơ drô̆ y tế ƀlep bơ ngai hơ găt hăm bơ ngai truh đơ̆ng tơ ring đei jĭ; phak tơ păt dôm bơ ngai ư̆h kơ tơ roi tơ băt dăh mă tơ roi tơ băt hăm khŭl jang pơ gang ư̆h kơ tơ păt.

Thuem: Tơ blơ̆