VOV4.Bahnar  – Kơsơ̆ năr 8/9, Anih vei lăng kon pơlei dêh char Lâm Đồng hlôi tơbang pơkăp găh tơdrong axong vih pơm jang hăm minh ƀar tơdrong tĕch pơdro tơguăt hăm jang tang găn păng tơjră pơrang jĭ  Covid-19 gơh xơđơ̆ng. Dang ei dêh char Lâm Đồng hlôi kĕ tang găn pơrang jĭ, tơdrong tơpoh pơrang jĭ truh mă hăt noh đơ̆ng dôm bơngai vơ̆r gre, bơngai chơ tơmam drăm păng kon pơlei chôt vih đơ̆ng dôm tơring hơbuh pơrang jĭ.

          Hăm dôm anih hơbuh pơrang đei ƀôh dang ei hlôi đei tang găn tơnăp. Vă vei xơđơ̆ng pơm jang kơjăp kiơ̆ “pơkăp jang hadoi” tang găn păng păng tơjră pơrang jĭ răh, hơtŏk răh mŭk drăm – tơpôl, pơm trong hiôk ăn dôm anih jang mŭk drăm, kon pơlei da ƀiơ̆ tơnap tap, Anih vei lăng kon pơlei dêh char Lâm Đồng pơkăl rim anih jang, jơnŭm tơpôl păng Anih vei lăng kon pơlei dôm apŭng, plei tơm lơ̆m dêh char axong pơm jang hăm minh ƀar tơdrong jang tĕch pơdro iŏk đơ̆ng 5 jơ kơsơ̆ năr 8/9; pơdơh lê̆ dôm anih akŏm hơlen tang găn păng tơjră pơrang jĭ Covid-19 lơ̆m dêh char. Găh dôm anih hơlen tơ̆ 'măng mơ̆t lĕch tơ̆ dêh char pơtoi pơm jang.

Lan chih păng pơre nơ̆r