VOV4.Bahnar - Kơsơ̆ năr 17/5, Dơnŏ anih chĕp pơgơ̆r pôk rơ̆ih dêh char Lâm Đồng hlôi pơgơ̆r hop akŏm tơbăt hăm khŭl chĭh kơtơ̆ng ang vă tơroi tơbăt dôm tơdrong kơtơ̆ng ang đei ƀơm trŭh bơ̆ jang hơmet ăn pôk rơ̆ih păng riim trong pơgơ̆r tăh hla kơ dôm bơngai tăh hla tŏk bŏk pơm kiơ̆ oei hơdrô̆, vei lăng ăng tông vă tang găn jĭ Covid-19 lơ̆m tơring. Dang ei bơ̆ jang hơmet ăn pôk rơ̆ih Kơdră tang măt Kuô̆k hô̆i jăl XV păng Kơdră tang măt Jơnŭm vei lăng kon pơlei dêh char Lâm Đồng hlôi jang keh đang. Kiơ̆ đơ̆ng Dơnŏ anĭh vei lăng jang pơgang dêh char Lâm Đồng, dang ei Lâm Đồng tim mă đei ƀô̆h bơngai ayơ đei tơpŏh jĭ Covid-19 ră. Lơ̆m dêh char ăn oei hơdrô̆ 588 ‘nu bơngai, lơ̆m au ăn oei hơdrô̆ tơ̆ rim hnam pơgang ‘nŏh 16 ‘nu păng tơ̆ hơnĭh ăn oei hơdrô̆ akŏm ‘nŏh 338 ‘nu păng ăn oei hơdrô̆ lơ̆m hnam kơ dĭh ‘nŏh 234 ‘nu. Vă sơđơ̆ng ăn bơ̆ jang tang găn jĭ Covid-19, vĕh ver tơpŏh lơ̆m khei ‘năr tăh hla, dôm bơngai đei ăn oei hơdrô̆ au gô tăh hla kơ tă tơ̆ hơnĭh ăn oei hơdrô̆ hloi.

Tơblơ̆ nơ̆r: Amazưt