VOV4.Bahnar - Khŭl mơ lôh jang mơ dro sa Việt Nam ‘nao jang hơ dai hăm Grŭp jang TTC păng Khŭl mơ lôh jang mơ dro sa dêh char Lâm Đồng pơ gơ̆r lêh pơ jao asong 1.000 tŏ kit hơ len lăng SARS-CoV- 2 ăn kơ dêh char Lâm Đồng pơ yua tơ tom tơ drong jang tang găn jĭ Covid-19. Pơ ma tơ̆ jơ pơm lêh, ƀok Trần Mến – Kơ dră chĕp kơ̆l vei lăng grŭp jang TTC Lâm Đồng tơ roi: Lơ̆m teh đak adoi hơ tŏk loi dơ̆ng lơ trong jang tang găn jĭ tơ poh lanh, lơ dêh char pơ lei tơm hlôi pơm kiơ̆ ư̆h kơ ăn akŏm lơ bơ ngai, tơ tĕnh tơ chă dôm bơ ngai ngôi tơ jê̆ hăm bơ ngai jĭ păng pơ vang găn lơ hơ nih. Đà Lạt jĭ pơ lei tơm tơ mang lăng, kơ na tơ drong vei lăng ‘lơ̆ng jĭ đei ƀơm ‘lơ̆ng tôch kơ tih truh tơ drong tang găn jĭ tơ poh lanh lơ̆m tơ pôl, tơ jur ƀiơ̆ hiong răm truh hơ tŏk tơ iung mŭk drăm – tơ pôl, mă loi ‘noh jĭ anih jang tơ mang lăng. Hơ dai hăm ‘noh, bơ̆ jang hrĕnh vă vei đei pơ lei tơm ư̆h kơ đei bơ ngai jĭ hơ yơ gô tơ gop ăn tơ mang lăng dêh char Lâm Đồng tơ iung hrĕnh đơ̆ng rŏng jĭ hơ buh đei vei lăng.

Thuem: Tơ blơ̆