VOV4.Bahnar - Pơgê năr 17/5, Dơnŏ anĭh vei lăng kon pơlei dêh char Lâm Đồng hlôi chĭh pơtrŭh hla bơar drơ̆ng kiơ̆ trong jang ăn hŏk tro jăl ƀar pêng, sinh viên rim hnam trương lơ̆m dêh char hơnơ̆ng pơlong jăl hŏk mă II lơ̆m 3 năr păng keh đang hơdrol năr 21/5 kơnh.

Kiơ̆ nơ̆r apĭnh đơ̆ng Dơnŏ anih vei lăng Hnam trương pơtho hŏk pơhrăm dêh char Lâm Đồng drơ̆ng mĭnh nơ̆r ăn hŏk tro, sinh viên rim lăm hŏk tim mă pơlong đang jăl hŏk mă II hơnơ̆ng pơgơ̆r dơ̆ng lơ̆m rim năr 19, 20 păng 21/5; rim khŭl anai hơnơ̆ng pơdơ̆h hŏk. Pơtôch ‘măng pơlong au, rim hŏk tro, sinh viên lơ̆m dêh char hơnơ̆ng pơdơ̆h kơ hŏk vă tang găn jĭ Covid-19. Hăm hŏk tro lăm 12, Dơnŏ anĭh vei lăng kon pơlei dêh char athei Dơnŏ anĭh vei lăng Hnam trương pơtho pơhrăm dêh char pơtho tơbăt hŏk pơhrăm ming kiơ̆ pơtho trư̆k tuyên. Hơdrô̆ tơring tơnap tap, tơring kon kông, ư̆h kơ đei kmăi kmŏk vă hŏk ming dơ̆ng ‘nŏh gơ̆h hŏk ming tơ̆ hnam trương mă lei rim lăm hŏk au to đei pruih pơgang hơdrol ăn hŏk tro năm tơ̆ hnam trương. Lơ̆m khei ‘năr hŏk tro năm tơ̆ hnam trương, ư̆h akom lơ hlŏh 30 ‘nu bơngai lơ̆m 1 lăm păng đei gom ƀŏ, ôp ti hăm đak pơgang, oei hơtăih dĭh băl, sơđơ̆ng ăn rim tơdrong tơchơ̆t găh tang găn jĭ.

Tơblơ̆ nơ̆r: Amazưt