VOV4.Bahnar - Kơ sơ̆ 6/8, Anih pơ gơ̆r jang tang găn jĭ Covid-19 dêh char Lâm Đồng đei tơ drong tơ chơ̆t hăt hot athei pơ vang găn tơ pôl kiơ̆ tơ drong Tơ chơ̆t 16 đơ̆ng Thủ tướng tĕh đak tơ̆ 2 xăh lơ̆m plt Đà Lạt. Kiơ̆ kơ ‘nŏh, iŏk đơ̆ng 19h gơ măng ‘năr 6/8, 2 xăh Xuân Trường păng Trạm Hành kơ plt Đà Lạt pơ tơm pơm kiơ̆ tơ drong pơ vang găn tơ pôl kiơ̆ tơ dỏng Tơ chơ̆t 16 truh đei nơ̆r tơ chơ̆t ‘nao dơ̆ng.

Tơ drong jang tơ chă bơ ngai krê tơ pŏh jĭ oei đei anih jang kơ pal dêh char Lâm Đồng tơ lĕch jang tôch pơ nĕh

Tơ drong tơ chơ̆t pơ vang găn tơ pôl tơ̆ 2 tơ ring tơ ter plt âu đei tơ lĕch ƀât mă jĭ Covid-19 oei tơ pŏh tôch hơ mơt. Anih pơ gơ̆r jang tang găn jĭ Covid-19 dêh char Lâm Đồng pơ jao ăn Kơ dră vei lăng kon pơ lei plt Đà Lạt pơ gơ̆r tơ lĕch jang. Ƀơm truh anih ‘nao đei jĭ, dêh char Lâm Đồng hlôi tơ lĕch nơ̆r roi tơ băt vă chă dôm bơ ngai đei măt tơ̆ dôm anih krê tơ pŏh jĭ. Lơ̆m nŏh, ‘ngoăih kơ dôm anih găh 2 xăh Trạm Hành păng Xuân Trường, oei đei 1,2 anih nai tơ̆ dôm phương 1, 2, 4, 9 păng 10 lơ̆m plt Đà Lạt. Dang ei tơ drong tơ chă bơ ngai, chĕng găn tơ ring vă tang găn jĭ, ưh ăn jĭ tơ pŏh lơ̆m tơ pôl tŏk bŏk đei dôm anih jang kơ pal tơ lĕch jang tôch pơ nĕh.

Dơ̆ng: Tơ blơ̆