VOV4.Bahnar - Anih vei lăng kon pơ lei dêh char Lâm Đồng ‘nao đei hla ar drơ̆ng nơ̆r trong jang hơ met ming, pơ̆ih să trong koĕch koĕl Prenn, trong năm mơ̆t lơ̆m pơ lei tơm Đà Lạt vă pơm lăp hăm ‘meh vă năm vih vơ̆t, hơ met pơ ‘lơ̆ng tơ drong hrăt hrot đei ƀôh ƀơ̆t jơ năr đei lơ tơ moi tơ mang lăng.

Trong koĕch koĕl Prenn Đà Lạt gô đei pơm hơ met, pơ̆ih să 4 tong gre ô tô kơ dâu 1 ‘măng

Tơ drong jang hơ met ming, pơ̆ih să trong koĕch koĕl Prenn kơ jung 7,4km, hơ nih blŭng tơ ƀưh hăm trong gre kơ dâu hrĕnh Liên Khương - Prenn, hơ nih hơ tuch tơ jê̆ trong koĕch koĕl Prenn hăm trong 3 khei 4 (phường 3, pơ lei tơm Đà Lạt), hăm akŏp jên pơm 514 ti hlak jên. tơ drong jang đei pơm să 4 tong gre ô tô kơ dâu 1 ‘măng kiơ̆ hơ găt ‘lơ̆ng trong jăl 3 tơ ring groi kông, kơ dâu hrĕnh 60km lơ̆m 1 jơ, hơ nă trong să 15m păng kơ pal trong 14m. Tơ̆ trong đei hơ met ăn 1 pôm gơng kơ jung 120m vă hơ met pơ ‘lơ̆ng trong đŏng, hơ dai hăm hơ met ăn hơ nih chă lăng ngôi, đei 2 trong veh ver kơ xar bar.

Thuem: Tơ blơ̆