VOV4.Bahnar - Dơnŏ anĭh vei lăng kon kông dêh char Lâm Đồng tơbăt, lăp đơ̆ng rŏng hơlen, rơ̆ih ‘moi kiơ̆ tơdrong lăp đon đơ̆ng kon pơlei kon kông oei tơ̆ rim pơlei pơla … trŭh dang ei hlôi drơ̆ng minh nơ̆r chĭh tơmơ̆t lơ̆m hla bơar đei 479 ‘nu bơngai đei kon pơlei yom. Hơnăn au hlôi đei Dơnŏ anih vei lăng kon pơlei dêh char kĭ tơchơ̆t. Dôm bơngai đei hơnăn au jei dôm bơngai đei kon pơlei yom kơtang, bơ̆ jang ‘lơ̆ng, đei tơgop tĭh tên lơ̆m kơtum kơtŏng ‘nhŏng oh, pơlei pơla, đei kơdră tơring, apŭng, pơlei tơm yom kơtang…Đe sư jei jing dôm bơngai pơm jŭk yŭk trong hơlau lơ̆m atŏk tơ iung mŭk drăm, chă hơvơn kơtum kơtŏng păng kon pơlei vang jang kiơ̆ rim tơdrong pơkăp, xut xa tơdrong oei sa ư̆h kơ ƀlep, pơm kiơ̆ tơdrong erĭh sa ‘nao. Dôm bơngai ‘lơ̆ng, đei kon pơlei yom lơ̆m dêh char jei hlôi jang kiơ̆ ‘lơ̆ng tơdrong hơvơn kon kông kơrŭn jơhngơ̆m jang sa; jang kiơ̆ kơ jăp rim trong bơ̆ jang đơ̆ng Đảng, Khôi luơ̆t tĕh đak, tơgop jang kiơ̆ jơnei rim trong tơlech jang atŏk tơ iung mŭk drăm - tơpôl, vei lăng kơ jăp sơđơ̆ng chĭnh trĭ, sơđơ̆ng tơpôl lơ̆m tơring.

Tơblơ̆ nơ̆r: Amazưt