VOV4.Bahnar - Truh dang ei, tơlĕch kon jên tơmơ̆t jang tĕh đak kơ Lâm Đồng ‘nŏh đei hlŏh 1.167 ti hlak jên, jơnei vă jê̆ 22% trong tơlĕch jang. Pơtêng hăm dôm khei au sơnăm sơ̆ tơ jur 0,3%. Tơdrong tơm tơlĕch kon jên hiơ hiơ̆ ‘nŏh kơ yuơ tơhlăk găh pơm hla bơar tơmơ̆t jên jang, găh hơgăt tĕh păng mĭnh ƀar tơdrong hiơ hiơ̆ đơ̆ng tơngla tơmơ̆t jên jang, hơnĭh iŏk jang ming man. Vă tơgop atŏk tơ iung mŭk drăm, Dơnŏ anĭh vei lăng kon pơlei dêh char Lâm Đồng athei rim hơnĭh bơ̆ jang, tơring tơrang hơnơ̆ng jang kiơ̆ kơ jăp tơmơ̆t jên jang tĕh đak hăm kon jên bơ̆ jang dêh char sơnăm 2021. Adoi ư̆h kơ ăn hloi kon jên tơmơ̆t jang hăm dôm hơnĭh ming man jang ư̆h kơ jăl keh đang trŭh năr 30/6/2021 hlŏh 50% pơtêng hăm kon jên đei pơ prŏ ăn tơdrong vă jang tơ̆ hơnăp dăh mă ư̆h jơnei hlŏh 30% pơtêng hăm kon jên pơ prŏ ăn tơdrong vă ming man ‘nao, pơtrŭh ăn rim tơdrong vă jang hlôi đei tơlĕch kon jên jang ming man lơ. Păng trŭh năr 30/9/2021, ư̆h kơ pơ prŏ ăn kon jên sơnăm đơ̆ng rŏng hăm rim hơnĭh ming man tim mă keh đang 30% pơtêng hăm kon jên pơ prŏ ăn jang. Đei băt, sơnăm 2021 Lâm Đồng đei pơjao akŏp kon jên tĕh đak tơmơ̆t jang hlŏh 5.245 ti hlak jên.

Tơblơ̆ nơ̆r: Amazưt