VOV4.Bahnar - Mă đơ̆ng ƀơm ưh ‘lơ̆ng đơ̆ng jĭ Covid-19, mă lei lơ̆m jăl khei mă 1 sơ năm ‘nâu, dôm tơ ring tơ̆ dêh char Lâm Đồng oei chă đei tơ drong jang ăn vă jê̆ 6.000 ‘nu bơ ngai jang, tơ gop pơm hơ tŏk iŏk yoa, vei lăng ‘lơ̆ng tơ drong arih. Lơ̆m kơ sô̆ vă jê̆ 6.000 ‘nu bơ ngai chă đei tơ drong jang ‘nŏh đei hlŏh 1.830 ‘nu bơ ngai chă đei tơ dỏng jang ‘nao, hlŏh 100 ‘nu bơ ngai năm jang tơ̆ tĕh đak đe, iŏk đei 20% nơ̆r hơ găt, tŏk 10% pơ têng hăm khei âu sơ năm sơ̆.

Atŭm hăm ‘nŏh Anih vei lăng tơ drong jang xa, linh jĭ rơ ka păng tơ pôl oei pơ gơ̆r lơ ‘măng roi tơ ƀôh găh tơ drong jang, tơ gŭm hŏk tơ drong jang hơ dai hăm tơ lĕch dôm tơ drong tơ gŭm, pơ tâp pơ hrăm, pơ tho tơ drong jang kiơ̆ lơ trong, pơ tăm, vei rong chĕh phe, pơ tăm ‘nhot, pơ kao hăm kơ măy kơ mŏk, rong kon tơ rong, pơ gơ̆r pơ tho tơ drong jang kơ măy, hơ met unh điên, chơ chŏh hơ băn ao, ming man…

‘Nâu jĭ dôm tơ drong jang tôch lăp, dang ei đei lơ công ty, anih tĕch mơ dro tơ̆ tơ ring oei chă bơ ngai jang, tơ gop ‘lơ̆ng ăn tơ drong hơ găt chă tơ drong jang ăn đơ̆ng 13.000 - 15.000 ‘nu bơ ngai lơ̆m sơ năm 2021 kơ dêh char Lâm Đồng.

Dơ̆ng: Tơ blơ̆