VOV4.Bahnar  – Pơgê năr 5/7, Anih jang Hơlen pơrang jĭ dêh char Lâm Đồng hlôi xơng hloh 50.350 tơmam test hơlen tenh xơmach SARS-CoV-2 đơ̆ng minh anih jang mŭk drăm tơgŭm ăn dêh char. Tơmam test hơlen tenh xơmach SARS-CoV-2 âu đei Anih tơm Y tê̆ axong iŏk yua, hăm tơdrong pơkăp hơdăh trŏ kiơ̆ ƀlep đơ̆ng Anih jang Y tê̆ apŭng plenh teh (WHO) đei Kŏng ti jang găh gre vih vơ̆t Phương Trang răt tơmơ̆t đơ̆ng teh đak Hàn Quốc axong ăn dêh char Lâm Đồng 'măn ăn tơdrong jang tang găn păng tơjră jĭ Covid-19.

Kiơ̆ kơ ƀok Nguyễn Quốc Minh, Kơdră Anih jang Hơlen pơrang jĭ dêh char Lâm Đồng, tơdrong xơng đei dôm tơmam test hơlen tenh âu noh kăp gĭt hloh, gĭt kăl ăn tơdrong jang tang găn păng tơjră pơrang jĭ Covid-19 lơ̆m khei năr dang ei kơ tơring. Kơtă ăh xơng đei, anih jang gô tenh kuăng axong ăn dôm anih jang kăl lơ̆m dêh char vă hơtŏk tơdrong pơyua lơ̆m hơlen pơrang jĭ, vei xơđơ̆ng ăn tơdrong jang tang găn păng tơjră pơrang jĭ.

Lan chih păng pơre nơ̆r