VOV4.Bahnar - Lêh ƀlŏk hơ dơ̆r kơ kon pơ lei păng kang ƀô̆, khŭl linh lôch lơ̆m jĭ hơ buh Covid-19 yua đơ̆ng Anih jang Trung ương MTTQ Việt Nam păng Anih vei lăng kon pơ lei kơ pơ lei tơm Hồ Chí Minh jang hơ dai gô pơ gơ̆r lơ̆m 8jơ gơ măng kơnh (19/11) tơ̆ 2 hơ nih pơ dăh tơ vi Hà Nội păng pơ lei tơm Hồ Chí Minh. Lơ̆m vă jê̆ 2 sơ năm âu ki, jĭ hơ buh Covid-19 đei ƀôh hlôi pơm hiong răm tôch kơ tang ăn pơ đĭ apŭng plĕnh teh, lơ̆m noh đei teh đak bơ̆n. Mă đơ̆ng đĭ đăng Đảng, đĭ đăng kon pơ lei, đĭ đăng linh hlôi mơ̆t jang tôch bơ neh hăm jơ hngơ̆m đon “ Tơ jră jĭ nhen tơ jră ayăt”,  tơ lĕch jơ hngơ̆m pran păng tơ drong sơ đơ̆ng hơ kâu jăn kơ kon pơ lei ‘noh kăl hloh, mă lei jĭ hơ buh tôch kơ tang, tam mă ƀyơh đei. Hloh 1 triệu ‘nu jĭ Covid-19; jĭ hlôi pơm ăn hloh 23 rơ bâu ‘nu kon pơ lei, kang ƀô̆ păng khŭl linh lôch. Lơ̆m dang 8 jơ 1 puăt gơ măng kơnh, tơ̆ pơ lei tơm Hồ Chí Minh, Hà Nội gô vang pơ gơ̆r rim tơ drong jang tơ̆k ŭnh jrĕnh, soh nhang, hơ tat ŭnh kơ đeng pơ kao tơ̆ đak. Rim hnam hơ kŭm, hnam khop gơ gŭ teng neng ƀlŏk hơ dơ̆r, rim duk thŏng nan tơ̆ rim hơ bong đak tơ̆ pơ lei tơm Hồ Chí Minh gô kơ tĭt tơ giĕp, tơ̆ lơ hơ nih, kon pơ lei đei pơ trŭt pĭt ŭnh kơ đeng, tơh ŭnh jrĕnh ƀlŏk hơ dơ̆r.

Thuem: Tơ blơ̆