VOV4.Bahnar - Pơ gê 28/9, pơ gơ̆r Vŏng thi mă hơ tuch păng hơ păh tơ mam ăn tơ drong thi druh dăm rơ gei yoa tŏ ‘mi kial 2021 kiơ̆ trong trư̆k tuyê̆n. Tơ drong thi “Druh dăm rơ gei yoa tŏ ‘mi kial” đei tơ lĕch đơ̆ng ‘năr 28/5/2021 ‘măn ăn kon pơ lei Việt Nam oei arih xa lơ̆m tĕh đak, đei sơ năm đơ̆ng 6-25 sơ năm, yoa Trung ương Đoàn TNCS Hồ Chí Minh jang hơ doi hăm Tơ drong jang atŏk tơ iung kơ Liên Hợp quốc tơ̆ Việt Nam pơ gơ̆r. 

Anih pơ gơ̆r hơ păh tơ mam ăn dôm bơ ngai iŏk đei jơ nei

Tơ drong thi jŭm dăr dôm tơ drong Druh dăm hăm dôm trong jang roi tơ băt rơ gei vă hơ tŏk đon hlôh vao găh tŏ ‘mi kial tơ plih; dôm trong jang pơm tơ jur ƀiơ̆ tơ drong hiong răm đơ̆ng tŏ ‘mi kial tơ plih dăh mă găn ƀiơ̆ hơ yŭh plenh tĕh roi tŏ. Đơ̆ng rŏng kơ set hơ len, Khul châm hơ len rơih 10 khul thi hăm 10 đon pơ chĕh rơ gei hlŏh vă mât thi vŏng mă hơ tuch. ‘Nhŏng Nguyễn Văn Hiển, jang tơ̆ kơ đông linh Si Pa Phìn, Anih chĕp kơ̆l khul linh ƀô đô̆i vei lăng tơ ring sơ lam dêh char Điện Biên iŏk đei jơ nei mă 1 lơ̆m tơ drong thi, iŏk đei ƀăng khen đơ̆ng Trung ương Đoàn păng jên tơ gŭm atŏk tơ iung đon tơ chĕng đei kơ jă 50 triu.

Dơ̆ng: Tơ blơ̆